Ég hef unnið ansi margar vinnur frá því ég tók þá fyrstu og þar til nú. Mig langaði að rifja þær upp og ákvað að gera það bara hér og telja þær í leiðinni.
1. Seldi Faxa fyrir afa oft, byrjaði ca. 9 ára kannski?
2. Fékk að vera sendill fyrir Sjúkrahúsið í Keflavík eitt sumar, klukkutíma á dag, árið 1982.
3. Passaði börn eitt sumar, var í vist eins og það var kallað. Strákarnir hétu Siggi og Ási, og þetta var árið 1983.
4. Fékk vinnu í einhverju frystihúsi í Ytri-Njarðvík, (kannski hét það Sjöstjarnan?), einn mánuð, svo út til Bandaríkjanna með pabba og mömmu og svo aftur einn mánuð í frystihúsinu. Var aðallega að ormahreinsa og skera úr. Úff man að ég átti að bíða á Aðalstöðinni eftir að rúta kæmi og næði í mig á morgnanna og fyrsta morguninn missti ég af henni og fór að grenja og hljóp heim til mömmu sem keyrði mig. En ég var líka bara 13 ára árið 1984.
5. Fékk aðra fiskivinnu, en í þetta skipti töluvert skemmtilegri. Lítið fiskihús, fékk að skera flatfisk og pakka, og stundum að vera á frystibandinu, sem var ýkt stuð. Nýfermd árið 1985.
6. Fékk bestu fiskivinnuna til þessa, nú í Stórumilljón sem var stórmerkilegt frystihús við endann á Vatnsnesvegi. Þarna vann farandverkafólk frá Ástralíu og Suður-Afríku og stóru strákarnir í pönnunum voru sætir. Tóti tönn vann þarna, og hann var með fáar tennur, reykti gras og sagan segir að kötturinn hans hafi gert það líka. Þarna var bónuskerfi og verkstjóri í glerbúri og merki sem safnað var þegar hver bakki var búinn og allt. Reykingapásur á hverjum klukkutíma (ég reyndar ekki byrjuð að reykja þarna). En ég semsagt bara vann í Bubba Morthens-texta sumarið 1986.
7. Fékk vinnu í flugeldhúsinu fyrir Atlandsflug. Vann hjá Axel Jónssyni veitingamanni sem rak líka Glóðina og Lang-best. Mjög gaman enda ég líka búin með Gaggó og á leið í Fjölbraut árið 1987.
8.Get ekki munað hvað ég vann 1988. Finnst eins og það hafi verið fiskur, en hvar? Hmmm.
9. Vann hjá kananum á Hotel Navy Lodge sumarið 1989. Reyndar bara í júní og júlí því í ágúst fór ég sem skiptinemi til Marseille í Frakklandi og var í ár. Las The Shining þetta sumar, og bondaði vel við lýsingarnar á amerískum hótelteppum og fleirru í þeim dúr.
10. Spilaði á tónleikum allan ágúst 1990 úti í Frakklandi og fengum greitt fyrir það. Telst til fyrsta ársins sem ég fékk smá innkomu fyrir að spila tónlist.
11. Já 1991 vann ég í plötubúðinni Hljómval í Keflavík...
12. ...og aðra hvora helgi á Ránni sem barþjónn, enda ný-orðin tvítug. Svo hætti ég á barnum og fór að selja miða inn.
13. 1992 fór ég til Marseille og reyndi að vinna fyrst sem þjónn á veitingahúsi en fékk ekki greitt og því fór bandið mitt, Something Else, aftur af stað og við unnum fyrir okkur með spileríi fjögur kvöld í viku allt sumarið.
14. Fékk vinnu í leikfangaverslun eftir að ég lauk stúdentsprófi frá F.S. árið 1993.
15. Var flutt í bæinn og byrjaði í Háskóla Íslands árið 1994 og því fékk ég mér sumardjobb í bænum í fyrsta sinn. Fékk vinnu á lagernum hjá Heilsuhúsinu, í Auðbrekku í Kópavogi. Var það hálft sumar....
16. ...og hinn helming sumarsins 1994 var ég að vinna í Svarta Svaninum, sjoppu, ísbúð, grilli og vídeóleigu á Rauðarárstíg.
17. Sveitaballarúntur tekinn árið 1995 með hljómsveitinni Unun. Ekkert unnið annað, enda var þetta full-time job og meira til.
18. Vann í söluturninum Texas á Ingólfstorgi árið 1996. Fínt bara.
19. Fór til Bretlands og fluttist svo heim aftur og fékk vinnu á Gott í gogginn á Laugavegi, fyrir ofan Kofa Tómasar frænda. Þetta var árið 1997.
20. Fór að vinna hjá póstinum sumarið 1998. Bréfberi. Ýkt gaman. Var með Hringbrautina. Stoppaði í ís í JL-húsinu í sjoppunni þar sem er nú hætt og komið er apótek í staðinn.
21. Var aftur bréfberi sumarið 1999, með Hringbrautina enn á ný. Vann held ég með skóla svo til áramóta. Þá var ég nú spræk maður. Beint úr burðinum og mætt í tíma í heimspeki bara. Jess!
22. Sumarið 2000 unnu ég og Curver í hljóðveri allt sumarið að því að gera plötuna Svarið. Tvímælalaust besta sumardjobbið til þessa.
23. Vorið 2001 vann ég hjá Gróðrastöðinni Mörk. Það var nokkuð gott.
24. Sumarið 2001 var ég ófrísk og við bjuggum á Laugarvatni. Þar vann ég í Íþróttamiðstöðinni við að vaska upp og skammta mat og gera sallöt og fl. þar til ég labbaði á hurðakarm og fékk fullan bakka af diskum á kaf í bumbuna. Læknir skipaði mér að hætta að vinna (komin 7 mán. á leið). Fór í gufubað daglega og sólaði mig. Mmmm.
25. Sumarið 2002 held ég að ég hafi útskrifast með B.A. úr H.Í. Svo held ég að ég hafi byrjað að vinna í útvarpinu með næturvaktirnar og verið eitthvað að skrifa frílans, m.a. fyrir Veru og Mannlíf.
26. 2003 vann ég fyrst á Asíu í hádegishlaðborðinu þeirra.
27. ....Svo fékk ég vinnu sem prófarkalesari fyrir Fréttablaðið, og var einnig með útvarpsþættina.
28. Fór aftur í póstinn árið 2004 en skrifaði líka fyrir Mannlíf, Moggann og Vesturbæjarblaðið. Vorum á leið til Berlínar um haustið.
29. Vann sem fyrir mér sem trúbador bæði á tónleikum og á götum úti. Reddaði oft fyrir mat. 2004-2005
30. Vann í Gufubaðinu á Laugarvatni sumarið 2005, eftir að við komum frá Berlín. Vei, hvað það var gaman.
31. Fékk vinnu á Blaðinu við að skrifa haustið 2005....
32. ....og fór að sjá um Ungmennafélagið, unglingaþáttinn á Rás 2. Enn með Næturvörðinn líka. 2005-2006. Gerði svo þáttaröð á Rás 1 árið 2006. Árið 2007 vann ég á Rás 2 fram í mars og....
33. fór þá í framboð fyrir V.G. og rak líka framboðsskrifstofuna. Var nokkurs konar atvinnupólitíkus í svona 2 mánuði árið 2007.
34. Sumarið 2007 held ég áfram að vera lausapenni fyrir Moggann sem ég hef gert í nokkur ár, en fæ líka vinnu í Skífunni í Fríhöfninni í Leifsstöð. Þar er ég nú.
Auk þessa hef ég minningar um:
35. saltfisk eitt haustið þegar ég kom frá Frakklandi árið 1992.
36. Vann á Síberíu netkaffihúsi sem netþjónn árið 1995.
37. Seldi geisladiska fyrir Smekkleysu, fór eina hringferð um landið og kom diskum inní búðir og kaupfélög.
38. Vann í uppvaskinu á einhverjum skemmtistað í Keflavík.
39. Vann í eldhúsinu á Fjörukránni í nokkrar vikur, minnir að ég hafi sloppið við að vera í víkingafötum, en er þó ekki 100% viss.

Man ekki meir í bili, þetta eru alveg 39 störf. Ég hef unnið sem: Blaðsölustúlka, Sendill, barnapassari, fiskvinnslustúlka, flugvélamatreiðslustúlka, herbergisþerna, tónlistarmaður, afgreiðsludama, barþjónn, miðasölustúlka, lagerstúlka, sjoppustúlka, netkaffiþerna, bréfberi, garðyrkjustúlka, eldhúshjálp, prófarkalesari, blaðamaður, útvarpskona, gufubaðsstúlka, trúbador, sölumaður og pólitíkus.
Geri aðrir betur!!!