Gleðilegt ár!
meira síðar, er ekki hætt að blogga bara ekki með netsamband svona almennt. bæ heiða

GLEÐILEG JÓL!
ljúft líf á Laugarvatni! pakkabrjálæðið búið og nú tekur kannski spilerí með popppunkti við, eða vídjógláp, .....eða bara bæði. Langar eiginlega ekkert í mat næstu árin... Er að horfa á Bibbajól í beinni, það er sko stuð. Ísinn að koma, veit ekki hvort ég get....reyni allavega. Fékk nýju Huldar Breiðfjörð-bókina (múrinn í Kína), og svo Bibba-safndisk, Hundslappadrífu-disk, Hjálma-disk, Óla Palla-safndisk, keypti sjálf Skáta-disk, og fékk mix-disk frá Tjödda, (hans eigin mix). Vantar því ekki marga diska af óskalistanum mínum. Kaupi mér Mugison og Björk og þá er ég sátt. Fékk náttlega Popppunkt, en líka Da Vinci Code-spilið. Fullt af sokkum, ilmvatn, Backgammonbók, og aðra bók um Elling, eitthvað til að geyma í sósur,....súkkulaðisígarettur og minnisbók með mynd af mér og elvari framaná (gert í Ranimosk)...er ég að gleyma? er ekki viss. Úfffff Óliver fékk svo mikið, hann bara er að drukkna í dóti, rosalega mikið, sko. Nú er óliver í spiderman-náttfötum í spidermansokkum að fara að horfa á Spiderman2 með spidermann-kallinn sinn í fanginu....Bæjó!

Skemmtilegasti dagur jólanna runninn upp. Ég er búin að kaupa allt fyrir löngu og á nú bara eftir að dreifa góðgætinu á liðið. Heimagerð kort sem þarf að koma út líka. Á leið í Reykjavík, leika sveinka, það er sko gaman. Sælla er að gefa en þyggja, held það sé rétt. Ég er í svaka stuði.

hjaaa, spilaði á tónleikum í gær á gauknum, alveg æði. Búin að fá Hjálma-disk og ÓlaPalla safndisk og Popppunktsspil(ekki búin að spila það...er eiginlega næstum ekki að tíma því fyrr en á aðfangadagskvöld). Ég er afar þakklát að hafa fengið þetta dót, því ég á svo lítinn pening, og langar í fleirri íslenska diska. Ætla að vona að ég geti splæst í Mugison og Björk áður en ég fer aftur til Berlínar. Það er ekkert eins hressandi á veturna og að vera með góða spennandi íslenska tónlist í eyrum á labb-/hjóla-/strætó-/lestar- þvælingi. Voðalega er gott að hafa nú vini og fjölskyldu til að hafa það notarlegt hjá. Íslenskt vatn er líka alls ekki ofmetið, það er bara ekki sambærilegt, ég þamba og þamba....mmmmm. Hlakka til jólanna bigtæm. Ætla að vera jólasveinn og dreifa kortum og pökkum til fólks í Reykjavík og nágrenni á Þollllák. Bragða jafnvel á skötu í fyrsta skipti. Ég held það sé kominn tími til, ég sem lét mig hafa að bragða á eggjapúnsinu, meira að segja eftir að Elvar hafði gefið því falleinkunn dauðans, sem versta drykk sögunnar...HA! Lælælæ., lífið er ágætt.

hæ, og jibbíjei, ég er á Íslandi í jólafríi....! Komum kl. tæpl. hálfeitt í gærnótt, og þá búin að taka einn leigubíl, sem næstum fór á vitlausan flugvöll, og tvær flugvélar sem villtust sem betur fer ekki mikið. Það voru komnir átján langir klukkutímar af ferðalagi, sem lítill piltur var búinn að þola, og vel það. Hann var til fyrirmyndar allan tímann, og greinilega ekkert mál að ferðast með honum. Bara hinn skemmtilegasti ferðafélagi, pilturinn. Á Íslandi hef ég ekki gert mikið, so far. Svaf, vaknaði, tók upp úr tösku, fór í heimsókn til Erlu Óskar, á fund, og erum nú komin til Laugarvatns. Hér er 5 gráðu frost, og stilla, og ÞÖGN eins og hún verður mest. Ætlum í gönguferð niður að vatni og hlusta á þögnina, og svo í gufubað og sund og heita potta á morgun. Lífið er bara fínt, sko, og á mánudag ætla ég að borga smá skuldir og fara í bókasafn og taka nokkrar bækur og reyna að læra smá...Bless bless

Nú er jólagjafakaupum I lokið, og þá taka jólagjafakaup II við. Þarf líka að ná að þrífa föt, þrífa smá íbúð og þrífa mig áður en klukkan slær átta miðvikudagskvöld. Þá eigum við nefnilega von á barnfóstrum og/eða leikfélögum Ólivers, sem einnig eru leikfélagar okkar hér í Berlín. Mér taldist til að 9 manns hafi passað eitthvað...gott að skipta þessu aðeins. Síðan er nokkrum öðrum líka boðið, og því verður þetta áræðanlega hið myndarlegasta bjóð. Ætla rétt að vona að dagurinn í dag verði happadrjúgur til að klára fataþvott,...og jafnvel að hægt sé að byrja á að skrifa inní jólakortin sem ég var að vatnslita um daginn. Þetta er nokkuð sniðugt sístem, að vera búin með megnið af jólastöffi áður en klukkan slær 16. des í staðin fyrir að klára áður en búðum lokar á Þorláksmessu...Ég held að stressið sé þar með útilokað, og það er einmitt markmiðið. Keypti mér meira að segja sturtusápu sem lofar á umbúðunum að hún eyði öllu stressi. Til þess notar hún Patchuli, Lavender og Ylang Ylang (hvernig er þetta nafn á ilmolíu eiginlega borið fram?)
Jájá, fórum í meira tívólí í gær. Elvar drakk sitt fyrsta og síðasta Eggjapúns. Ég treysti honum, þannig að þetta verður hér með eitt af þeim hlutum sem ég ætla ekki að prófa áður en ég dey. Hann kúgaðist yfir þessum vinsæla drykk, hvernig myndi ég þá vera sem er eitthvað svo viðkvæm fyrir svona slepjudrykkjum? Man að ég ældi næstum yfir AlohVera-drykkjarjógúrtinni sem kom á marðaðinn hjá MS á síðasta ári. Hún bragðaðist nú reyndar eins og gubb, en margir fíluðu það samt alveg súper vel. En mysudrykkirnir sem voru hér í gangi inðeeitís, Mangósopi og eitthvað...jakk. Smakkaði einhvern mysu-based drykk hér, blanda af mysu og jógúrti með framandiávaxtabragði. Það var bara æði!! Held að trikkið sé að blanda mysu og jógúrt. Í minningunni er Mangósopi ógeð, en AlohVera mun verra,....Elvar segir að heita Eggjapúnsið toppi þetta allt!

Jæja, nú hef ég loks frá einhverju að segja. Ég og Elvar vorum að koma heim frá smá spileríi, en við vorum fengin til að spila fyrir "Die internationale Messe für das isländiche Phärd" eða hvernig sem það er nú á þýsku, en þýðir allavega alþjóðleg sýning um íslenska hestinn. Þar voru um 1000 gestir (uppselt), og við opnuðum hátíðina, sungum "Tangó", ein í miðjum hring fullum af sandi, og svo hófum við leik á hinu sígilda og ofuríslenska "Á Sprengisandi" og þá komu allir hestarnir inn og fóru að leika listir allt í kring um okkur.!!! Vá þetta var næst því að vera með atriði í einhverjum Sirkus og ég hef komist. Fékk gæsahúð í seinna laginu, þetta var eitthvað svo ofuríslenskt og æðislegt. Ríðum ríðum rekum yfir sandinn, og þarna kom einn hestur á fullu....nei hann fór ekki á mig,... Rökkrið er að síga á Herðubreið!!!! Ég sver'ða, þetta er eitt það skrýtnasta sem ég hef gert. Óóóóóóóóógeðslega gaman, samt. Vorum að fabúlera á leiðinni heim hvort þetta væri undarlegustu aðstæður sem við kæmum til með að spila í á ævinni, en ég get vel ímyndað mér undarlegri aðstæður. Það væri til dæmis hægt að spila í partýinu sem er haldið rétt áður en geimflaug er skotið upp,...við myndum spila eitt lag, svo hæfist niðurtalningin.tíu,...níu....Þá er bara að reyna að koma sér í mjúkinn hjá NASA eða öðru geimflaugaráhugafólki.
Þessa íslensku diska verð ég að eignast:

Æla-nýr diskur /hmmmm ef einhver í Ælu les þá langar mig mest í þennan disk af öllum þeim útkomnum eða væntanlegum diskum....og það myndi veita mér ófáar gleðistundir í útlandinu að eignast fleirri en þau 3 lög sem ég hef í fórum mínum og hef spilað til skiptis í þrjá mánuði....;-) -váááááá hvað Magnari er gott lag!! ÆÆÆÆÆÆÆÆLLLLLLLLAAAAAAAAAAAAAAAAAAAAAAAAAAAAAAAAAAAAAAAAAAAAAAA

Hjálmar -nýr diskur /Veit ekki hvað hann heitir, en þetta er fyrsta alvöru ragggíið sem komið hefur út á Íslandi (sorrý Utangarðsmenn). Ég felldi nærri tár þegar ég var á tónleikum með þeim á Grandrokk síðasta sumar.

Skátar -nýr diskur /Svaka spennó nýtt band, með söngvara sem minnir mig á Þeysara og Baraflokkinn. Ótrúlega flottir læf líka.

Björk -nýr diskur(Fabúla)verð bara að heyra hann allmennilega og Björk er víst öll í tilraunamennskugír... hef bara heyrt eitt og eitt lag...

og síðast en ekki síst Mugison!!! vá, alveg bara flottasta læfperformans sem ég hef séð, (þegar hann spilaði í Gísla Marteini) síðan ég sá Ammæli í sjónvarpinu rétt eftir að það kom út....

af erlendum diskum liggur mér mest á þessum:

Tom Waits - nýr
Nick Cave - nýr
P.J.Harvey -nýr (heldann heiti uh huh her)
Streets -nýr
Robert Wyatt -nýr
...kannski fæ ég mér einn þeirra ef ég á einhvern afgang þegar okkar jólainnkaupum er lokið.
Nú er stefnan sett í bíó með Óliver á morgun (sunnudag), og líka í heimsókn til Sunnu og Jónu, svo eru jólagjafakaup í snattinu í 3 daga, og svo förum við í fluuuugvél.
ætli ég kíki ekki bara í háttinn...les í Harry Potter á þýsku þar til ég sé ekki augna minna skil...

hahahahah, fór og gerði það sem gleður alltaf: keypti mér börger og ný föt!!!
fékk buxur og peysu í H&M á tæpar 18 evrur og miðað við núverandi gengi á evru, sem er 82 íkr. kostar þessi alklæðnaður tæpan 1500-kall. Þetta gleður, og whooper á burgerking líka. Svo keypti ég blómvönd handa Elvari...hann varð svaka hissa, það var líka gaman. úff, ég er sko aldeilis skrýtin smákaka, bara annaðhvert blogg glatt og hitt dapurt...hmmm. Vedikki hvað er að ske. Manic/depressive light? Eða bara langþreytt...
En ég á fullan maga af hambrgra OG appelsínugular rifflaflauelisbuxur OG rauðan bómullarpeysuling. vika í heimför.

sofnaði kl. 6 í fyrrinótt, 4 í gærnótt, og nú er klukkan 2 og ég sybbin. Þetta er fínt! skil samt ekki hvernig stendur á því að ég sæki svona í að vaka á nóttunni. Þá er ég bara eitthvað að dunda mér alein. Lesa bækur, skoða í tölvunni, hlusta á tónlist...bara elska að vera svona að hanga einhvernveginn, þegar hinir sofa. æ skrýtið. Æ ég vildi óska að ég væri alltaf með allt í röð og reglu, og lifði ekki svona lífi sem er aldrei í föstum skorðum. Ég vil alveg verða alltaf syfjuð kl. 11 á kvöldin, og sofnuð fyrir miðnætti, og hress og glaðvöknuð réttfyrir sjö!!! Ég er bara alls ekki svoleiðis, spáiði í það hvað það væri einfallt líf. Alltaf einhvern vegin í stuði á morgnanna. Líf mitt er sko andstæðan við þetta. Það er sko málið, að lífið mitt passar ekki inn í neinn kassa, eða eitthvað þekkt form. Ég þarf að reyna að sætta mig bara við það..í stað þess að vera alltaf að óska þess að ég væri týpískari, óska mér viðráðanlegra lífs...Það er náttúrulega ekkert alltaf hægt, og ég er bara nátthrafn,og áður en ég veit af er ég komin í þá rútínu.En hey, þá er ég í rútínu eftir allt, bara ekki þeirri sömu og margir aðrir? Æ þetta er svo margslungið. Mig langar að vera A-manneskja, það er lokapunkturinn. Vil vakna 7: te, ristaðbrauð, blaðið, lesa, vera hress, fara út fyrir 9, læra/gera það sem þarf þann daginn. Langar til að fúnkera í kerfi, því það er svo létt...blablabla..ég veit ekkert hvað ég vil, eða hvað ég er að segja, veit ekki neitt, nema ég er ringluð og þreytt, og allt of margt að hugsa um, og allt eitthvað svo ófókusað og erfitt og já, hey,....þetta er blaðsíðan SKEMMTILEGT! uuuuu Er'ekki allir í stuði?!?

Svakalega skemmtilegt og mikið prógram búið að vera í gangi. Fórum í þrívíddarbíó á föstudaginn uppi á Potsdamerplatz. Sáum Santa versus the Snowman...og þetta var alveg eins og að vera bara inni í verstæði jólasveinsins á norðurpólnum. Óliver datt bara alveg út og gleymdi meira að segja að borða poppið sitt. Ég keypti mér Miranda appelsínudrykk til að sötra með myndinni,og mikið óskaplega höfðu Tappi Tíkarass rétt fyrir sér þegar þau sungu: ,,Helvítis Miranda, Miranda er vont!". En allavega þrívíddarbíóið IMAX fékk fullt hús stiga hjá mjög svo krítískri dómnefnd Ólivers, Elvars og Heiðu, og mælum við með þrívíddarbíói við öll tækifæri ef fólk mögulega getur. Enduðum bíóferðina á stuttu stoppi í Hagen Dass, og sáum svo loksins jólasveininn, sem sat á sleða á hjólum og hesturinn sem dró sleðann pissaði og kúkaði á gangstéttina!!! Seinna um kvöldið komu Hrafnkell og Sunna og við spiluðum DDR- spilið (eins og útvegsspilið, nema maður býr í austur-þýskalandi, og markmiðið er að ná að kaupa síma, trabant og ganga í flokkinn...áður en Stasí stoppar mann og sendir í fangelsi!) verulega hressandi spil. Laugardag: kökuboð hjá Magga og Eirúnu, og dóttir þeirra, Anna, og Óliver léku sér fram á kvöld. Tónleikarnir gengu mjög vel og allir glaðir og ánægðir. Annað kökuboð á sunnudag: Danskar smákökur hjá Dorte hinni dösku, og manni hennar Carlos frá Perú. Nýkomin heim, kvöldi eytt undir teppi og með bækur og kertaljós hugsa ég bara!+
Góðar stundir, skýrslan búin.

er vakandi á nóttunni, það er eitthvað sem þarf að fara að laga. las 2 bls. í fyrstu harry potter-bókinni á þýsku, meðan ég beið eftir að 2 þvottavélar kláruðust í dag. dansaði með joy division og s/h-draum og fleirri gleðisveitir í eyrunum í þvottahúsinu. hitastig berlínar svo þolanlegt að ég gat verið í pilsi, það er hressandi. smá jólaskraut að skjóta upp kollinum hér og þar, og er bara fallegt. ekkert á við Keflavík á þorláksmessu. er nú bara farin að hlakka til að sjá Keflavík á þorláksmessu...fá bílinn hjá pabba og mömmu og rúnta...he he he..allgjör gleði. keypti upptrekkjanlegt bangsímon-box með 20 bangsímon súkkulaðibitum í fyrir Óliver. Hann fær einn á hverjum morgni, eftir morgunmat. morgun, æfa mig á gítar og söng, laugardaginn spila á tónleikum. sunnudag: kökuboð hjá Dorte hinni dönsku. hún ætlar að baka danskar jólakökur og bjóða. linkaði á Eirik, hann er með puttann á púlsinum í berlín...

Ég á jólakjól:


svo á ég jólaklippingu:


svo á ég mat í ísskápnum:


svo á ég sætasta strák í heimi:


...og líka sætasta manninn:


og það er nú aldeilis indælt!

Já, hér eru dansandi möndlur í tilefni dagsins...alveg prýðissíða til að kíkja á og verða ringlaður í höfðinu og flissa er hér
Annars er ég afar hamingjusöm enda komin með nýja klippingu!

Hér er svona listi, hafði ekkert að gera, gaman að eyða tíma, vesssógú:

ever had a song written about you? Já, alveg nokkrum sinnum
what song makes you cry? eitthvað með Tom Waits, You're a big girl now með Dylan, öll platan Troubadour með J. J.Cale
what song makes you happy? rétt lag á réttum stað við réttar aðstæður. Ef ég þarf rólegheit og spila stuð er það ónýtt og öfugt. En það sem virkar næstum alltaf, alveg sama hvað er Lík-ami með Purrki Pillnikk. Og HAM-lög....og allskonar pönk...og.....;-)
height? 1,62
hair color? ljósbrúnt
eye color? sakleysisblár
piercings? nei
tattoos? nei
what are you wearing? gamalt pils, svartur rásar2-bolur, svartar sokkabuxur, dökkbrúnir apainniskór, themotherfuckingclash-ullarpeysa,...svört nærföt
what song are you listening to? la folie með stranglers
what taste is in your mouth? tungubragð
what's the weather like? ííííískalt og rakt
how are you? soldið svöng, ætti líklega að borða smá áður en ég fer að reyna að sofna
get motion sickness? nei
have a bad habit? hugsa að ég hafi helling, man eftir einum: ég bít alltaf í puttana mína á hlið þegar ég er að horfa á tónleika sem ég fíla. Ef ég eeeelska bandið þá bít ég bara alveg fast, og það kemur far og allt
get along with your parents? jájájájá
like to drive? skemmtilegt já, sérstaklega þegar maður er að fara eitthvað skemmtilegt eins og t.d. út í sveit. Leiðinlegt að keyra í umferð innanbæjar
boyfriend? Elvar
girlfriend? neibb
children? Óliver
had a hard time getting over somone? mhmm
been hurt? já
your greatest regret? æ ég veitða ekki, þýðir nokkuð að sjá eftir einhverju? Það gerist alltaf eitthvað, sama hvað maður velur. Stundum kemur eitthvað frábært út úr jafnvel klúðri og mistökum.
your cd player has in it right now? Sonic Nurse með Sonic Youth
if you were a crayon what color would you be? Svartur
what makes you happy? Að spila á tónleikum, og gleyma sér
what's the next cd you're gonna get? Vantar að kaupa nýja Tom Waits, nýja Nick Cave, nýja P.J.Harvey, nýja Björk, nýja Streets, og svo ætla ég að reyna að eignast Joy Division, það er svo frábært að hlusta á þá á veturna.
seven things in your room? gítar, bækur, kósílampar, hvít sería, vekjaraklukka, ullarsokar, tölva, seven things to do before you die? Semja lag sem lætur fólk skilja að það þurfa ekki að vera stríð, borga skuldirnar mínar, biðja alla sem ég hef gert eitthvað fyrirgefningar, sjá Sonic Youth spila, fara til Japan, finna staðinn sem ég vil verða gömul á, verða hamingjusöm,
top seven things you say the most? já, vá, æðislegt, sökka, geðveikt, snilld, sjiiiiiit,
do you...
smoke? nehei
do drugs? neits
pray? stundum
have a job? er tónlist vinna?
attend church? neeee

have you ever....
been in love? Já
had a medical emergency? ha, verið í lífshættu, neinei þaldéekki
had surgery? já, kirtlataka, og nokkrar aðrar smávægilegar
swam in the dark? já, meira að segja nöppuð af löggunni fyrir að brjótast inn í heitu pottana í sundlauginni í kef að nóttu til...vá það er soldið langt síðan...
been to a bonfire? já
got drunk? já
ran away from home? já, hef hlaupist á brott eftir að ég flutti að heiman
played strip poker? já
gotten beat up? verið kýld einu sinni
beaten someone up? aldrei, einu sinni sparkaði ég samt í öxlina á fyllibyttu sem var að horfa uppundir mig, hann sat fremst á sviði og glápti, og svo byrjaði hann að blása til að kjólinn lyftist...djöfull varð ég brjáluð, bara tók tilhlaup og sparkaði
been onstage? -Jájá
pulled and all nighter? jájá
been on radio or tv? Helling bara
been in a mosh pit? oft þegar ég var ung og brjáluð, nú er ég bara brjáluð (hehe), en ég er svo lítil og létt, og hugsa mér að ég gæti svo auðveldlega slasast (ég veit það, ég er allgjör aumingi)
do you have any gay or lesbian friends? Já
describe your first kiss... bjakk!
wallet? rautt slitið mikkamús og eitt svona indverskt hippalegt
coffee? latte macciato
shoes? einir rauðir háhælaðir, einir rauðir doctormartins sem eru að syngja sitt síðasta, enda 15 ára gamlir, og einir skeitarastrigaskór
cologne? á anais anais, langar í armani-mania (hint hint)

in the last 24 hours you have...
cried? var döpur fyrr í kvöld og þá sluppu nokkur,
bought anything? nei, gleymdi meira að segja að kaupa mjólk
gotten sick? smá magaverkur
sang? syng eitthvað á hverjum degi
been kissed? smá
felt stupid? nei
talked to an ex? nei
talked to someone you have a crush on? já
missed someone? já
hugged someone? já

Bæ

érmeðheimþrá. sökka í þýsku. kalt og rakt úti. hmmmmmm, hressið mig við?!!!?

Hulló, nú eitthvað hefur verið að í netheimum, því ég hef hvorki komist inn á blogger né hotmail...en í dag komst ég, vei! Á daga mína hefur flest drifið nema sumt en það er í lagi því það er miðvikudagur. Villi er í heimsókn og saman fóru hann og minn heittelskaði á Misfits-tónleika sem var víst betra en allir þorðu að vona, því trommarinn í Ramones (Markie) spilaði á trommur allan tímann, og var tekin Ramones-syrpa. Tónleikarnir voru á staðnum SO36, í Kreutzberg, sem er tyrkjahverfið hér. Ég sat hins vegar við hliðina á tónleikastaðnum, á mest gay og mest kitsch stað sem ég hef farið á á ævinni. Þar var allt loðið og bleikt (þ.e.a.s. veggir og loft) og það sem var ekki bleikt var glimmer. Sunna lýsti þessum stað best: "það er eins og að vera inni í einhverjum prúðuleikara". Spiluðu góðan slatta af fínu diskói, ég reyndi að læra smá, tókst illa, reyndi að kjafta smá, tókst miklu betur, svo ég hélt mig bara við það. Mjög gaman. Svo kebab, svo heim í næturstrætó. Allar leiðir liggja nú til Kreutzberg, þar er greinilega allt að gerast

það er skítkalt í Berlín. Allir í milljón peysum og undir teppum og eitthvað. Spurning að fara út og vera stutt og koma svo heim og þá er svo heitt heima. Langar að borða pikknikk í garði, en enginn nennir með mér í þessum kulda. Fer þá bara ein eða eitthvað. En fór í sendiráðspartý í gær. Þar var kvöldmaturinn borðaður í formi smárétta. Íslenskar sjávarafurðir í allskyns formi, smá lambakjöt á prjónum og NÓAKONFEKT í metravís í eftirmat. Alveg stórgóður kvöldmatur, og Óliver hegðaði sér eins og sönnum heimsborgara sæmir, stóð og tókk þátt í tjatti, horfði með móður sinni á gjörning sem gjörningaklúbburinn var með og dáðist að listaverkum, fjarrænn í augunum (kannski var hann bara að hugsa um hvernig hann gat náð sér í meira konfekt,...kannski voru allir sem voru spekingslegir og fjarrænir í augunum að hugsa um konfektið, hvað veit ég...). Gaman.
Farin út.

er á lífi. í lagi, og ætla að vera ýkt dugleg til heimfarar. lærlærlær, og nú er ég eimmitt á leið á kaffihús að læra, elvar er að reyna að svæla mig út úr húsi með því að skella cranberries á fóninn. Sú hljómsveit sem ég hata mest af öllum, eða bara aðallega söngkonuna sko, hún er viðbjóðsleg. Ég öskraði oooojjjjj, og hann sá að sér, þetta var of góð píning, og hann gaf mér séns og setti I Adapt í staðinn. Besta breyting á tónlist í mannkynssögunni: Frá Cranaberries til I Adapt. Elvar er fyndinn gaur, og fær hér með verðlaun frá mér, lét mig hlægja og það er gaman!!!!!!!!!!!!!!! Vill einhver segja að hann hati Cranberries líka, það er nebblega svo gott að vera sammála um að hata tónlist

Hot newsflash...Tæplega tveimur tímum eftir að ég skrifaði hamingjusama og jákvæða færslu um hvað allt væri nú gaman og gott, og matarboð í gangi og skemmtilegheit, fékk ég ælupest. Líklega versta ælupest ævi minnar. Elvar, Sunna, og Melli voru hér að drekka smá bjór og ég bara hljóp á klósettið á kortersfresti. Hélt því áfram alla nóttina til svona 9 um morguninn, þá kom pása, og svo ein ferð aðeins síðar...svo bara búið. Ég er samt búin að vera fárveik síðan þá, svaf í allan gærdag, og í nótt. Fyrst núna að ég er að byrja að geta setið og vakið, hef bara legið í móki. Er aum í innyflunum, svona eins og rosalega harðar harðsperrur í maga og þind. Líka orkulaus, og aðeins lystarlaus, en samt svöng..nýorðin svöng. Vonandi verður allt orðið gott aftur á morgun.

ókey, dagurinn hófst illa, en er að enda þetta líka frábærlega. Til að byrja með, er komin með bakverk af samblandi af skorti á sundi eða jóga, og vondri dýnu. Á morgun ætla ég að reyna að finna sundlaug og drulla mér, en það er víst soldið dýrt. Farin að hlakka til að mæta daglega í sund á Íslandi í jólafríinu, það er nú gott að láta sig hlakka til einhvers sem er betra á Íslandi en hér!!! jákvætt... en aftur að vonda deginum mínum. Sko, barnið var seint á fætur og átti í miklum erfiðleikum með að draga sig frá teiknimyndum þannig að við ákváðum að gera það skemmtilegasta sem hann veit, og kaupa hamborgara og kók. Fórum í hackeshens markt, þar sem við höfðum séð girnilega búllu, og pöntuðum 3 borgara, 1 eplasafa og 2 kók....allir sáttir. Borðið gott, sætin þolanleg..svo koma drykkir...HEITT kók, alveg næstum flatt, en eplasafi ólivers samt bragðgóður og ekkert sykursull, bara hreinn safi...en við gátum ekki drukkið kókið. Báðum um klaka, fengum svo borgara án franskra sem áttu að fylgja, og borgarar teknir aftur....líður og bíður þá fáum við loks klaka í skál og í kjölfarið borgara með frönskum, en nú eru þeir íííískaldir, því um 10 mín.eru liðnar síðan þeir komu fyrst á borðið. já, franskar heitar...en of kryddaðar, kókið heitt, og borgarinn kaldur... Ha? og kostaði mikið...en við borðuðum, fórum og lemtum svo í hagléli á leiðinni heim...úff og ég með bakverk líka...
Breytti um dag: Fór í olíubað og var lengi, drakk te, eldaði grænmetismat í tæplega 2 tíma við undirleik æðislegrar tónlistar, bauð í mat, drakk smá bjór, óliver borðaði vel og lék sér fallega, bakverkur farinn, hætt að vera reið út í fólk eða hluti sem skipta engu máli og eru hvort eð er ekki á mínu valdi!!!

Hápunktar vikunnar voru tvímælalaust á miðvikudags- og fimmtudagskvöldið. Afráðum að eyða ponsupening í að borða á veitingastað á miðvikudagskvöld og fengum Sunnu og Jónu í lið með okkur og allir beint á "blinda barinn". Það er staður sem heitir Nocti Vagus, en hefur undirtitilinn der Dunkel Bar. Dimmur bar semsagt en þar með er ekki öll sagan sögð, því starfsfólkið er allt blint eða sjónskert, og því engin ástæða til að hafa nokkuð ljós. Ekki má kveikja í sígarettu eða svara í síma eða kíkja á armbandsúr með ljósi...það er allt ljós bannað inná þessum stað!!! Hluti af stemmingunni er nefnilega að sitja í kolniðamyrkrinu og borða, drekka og vera glaður. Hægt er að panta af matseðli, og líka hægt að láta kokkinn koma sér á óvart. Ég vildi vita, og pantaði mér andabringu með allskyns grænmeti og sósum og ég veitekkihvaðoghvað...og það var alveg frábært, Elvar Jóna og Sunna vildu óvæntið. Þau fengu öll það sama óvænt, og nú tóku við heilmiklir samanburðir bóka um hvað væri á diskunum. Komist að niðurstöðu um að líklega væri um tvær gerðir af kjöti að ræða, en ómögulegt að segja til um hvað, kannski svínakjöt? Ég og Elvar gerðumst ævintýraleg og sendum gaffal með kjötbita yfir í myrkið skáhalt yfir borðið, og okkur tókst að gefa hvort öðru að smakka af okkar réttum. Lambakjöt, lýsti ég yfir harðákveðin...en mín steik var náttúrulega vituð. Núúúú, við eyddum dágóðum tíma í að sötra bjór í myrkrinu og augun vöndust náttúrulega ekkert, þannig að þau voru ýmist opin eða lokuð, og þetta hafði allt afskaplega róandi og góð áhrif á mannskapinn. Samræðurnar voru komnar langt aftur í bernsku og fólk almennt farið að sjúga þumalputta og ganga í barndóm. En allt tekur enda, og við tókum þá ákvörðun að koma okkur upp í ljósið. Þar greiddum við, og fengum að vita hvað óvæntið hefði verið það kvöldið: "Nú", svaraði þjónustustúlkan roggin, "Það er greinilega langt síðan þið prófuðuð krókódíl síðast". Hún var ekkert að plata, þau fengu krókódílasteik, strútakjöt, og kjúkling í kókos!!!
Held ég geymi bara hitt hælætið, það er ekkert hægt að segja meira í bili...erum enn að melta þessa reynslu.

var að linka á ásrúnbjútí...æðisleg síða, nóg að gerast!

-fundum búð sem selur alls kyns svona lífsnauðsynlega litla og frábæra (og ódýra) hluti. Rússabúð, hjón sem brostu hringinn og voru æði. Keyptum: inniskó f. óliver, nestisbox f. óliver, batterí, 2 minnisbækur til að bæta orðaforðann f. elvar og heiðu, húfu f. elvar, límtúpu, 2 kertastjaka. kostaði ca. 1600-kall. Berlín er ótrúleg...
-fundum aðra búð sem er bæði súkkulaðibúð og gallerí...það er að segja, sérhæfir sig í að hafa til súkkulaðistykki sem hvergi annars staðar fást og er þeim stillt upp í glærar hillur upp um alla veggi, eitt súkkulaði í hvert hólf. Þar fundum við pipp, fíkjustöng og tromp! Kallinn sagði að Lakkrísdraumur hefði verið til, en var búinn...Við keyptum hins vegar hið ameríska Reases Peanut butter cups með hvítu súkkulaði...mmmmm.
-barinn á neðri hæðinni sem heitir Luxus dj-ar af kasettum!!!!! það er mest kúl í heimi. Sat þar og drakk bjór e. tónl. á laugardag og bað um Sonic Youth, og þá fer konan bara að leita að kasettunni, fann bæði Dirty og Sonic Nurse á kasettu. Hvílíkt skemmtilegt. Éraðspá í að gerast kasettu-dj, því ég á nebblega frábært safn af góðum kasettum.
-hef komist að því að ég er novelty-freak. Með öðrum orðum, ég er háð því að prufa eitthvað nýtt, er svona rosalega nýjungagjörn. Eins og prinsessan sem átti 365 kjóla...en ég er það ekki varðandi föt samt. Að prófa mat, nammi, bar, gos, veitingastað, og bara endalaust eitthvað sem ég hef ekki séð/étið/drukkið áður, er eitthvað sem veitir mér óendanlega mikla gleði. Þetta er bara rugl. t.d. súkkulaðistykkið hér að ofan, ég bara valhoppaði í sælukasti, þegar ég hafði borðað það, það var nýtt fyrir mér, og það finnst mér gaman...Ég er rugluð!

Hæ!
Spilaði á tónleikum, það var alveg frábært bara. Búin að steingleyma hvað mér finnst gaman að koma fram. Þetta er alveg ávanabindandi rafmagn sem fer í gegn um mann við að spila á tónleikum. Líka svo fín útrás, verða aðeins stressaður, bara pínu. Og líða svo svona rosalega vel eftir á. Skrýtið, mér líður stundum eins og ég hafi verið að gera eitthvað sem skiptir máli...ekki að þetta skipti neinu máli nema kannski fyrir sjálfan mig. Enívei, gaman varða. Sunnudagur var tileinkaður afmæli sem við vorum boðin í hjá Önnu, 4gra ára. Fundum barbí og mættum í vöfflur og kaffi og súkkulaðiköku og allt mögulegt. Hreinlega toppurinn á afmælisreynslu Ólivers, só far, því það var skipulagður fjársjóðsleitarleikur sem hann fékk að taka þátt í. Foreldrar Önnu voru búin að teikna fjársjóðskort, og klipptu svo í sundur, og skrifuðu vísbendingar um hvar næsta vísbending væri falin aftaná hvern bút. Svo hófst leikurinn inni í eldhúsi og fór um alla íbúð og endaði úti í garði, þar sem Óliver var orðinn alveg örvinglaður og sagði við pabba sinn sem fór með út: "Pabbi, við finnum aldrei fjársjóðinn", alveg búinn að gefa upp alla von... En hann fannst, undir laufahrúgu, og var ekki af verri endanum. Súkkulaði-gullpeningar!!! Þetta var aldeilis frábært, og síðan fórum við heim í smá afslöppun eftir allan hasarinn, og til að toppa þennan fína dag, kom Eirik, og passaði og við fórum út á lókalbarinn í Pool. Enduðum á jafntefli, (3-3), og skildum því sátt, og frestuðum keppni þar til síðar. Pool er svo gaman, að ég bara brosi þegar ég hugsa um það. Held að þetta sé svona uppáhalds dægradvölin mín, jafnvel betra en bíó!!!

Dagurinn í dag pakkaður af gleði, eins og náttúrulega allir góðir dagar eiga að vera. Byrjaði í þvottahúsinu á að nota tímann og læra smá Schelling á meðan þvottur þvoðist. Las fyrstu blaðsíðuna í Philosophy und Religion....42 orð sem ég þurfti að fletta upp og glósa. 1 blaðsíða, 42 orð sem ég skil ekki. Þýska er erfið, úff. Set mér nú takmark: glósa lágmark eina blaðsíðu í Schelling á dag, helst 3, þá verða orðin væntanlega færri og færri, og orðin í kollinum mínum fleiri og fleiri.
Í kolli mínum geymi ég gullið
sem gríp ég höndum tveim
svo fæ ég vexti
og vaxtavexti
og vexti líka af þeim

Þetta er gömul auglýsing. Man hvað mér þótti þetta skemmtilegt lag.
En...eftir að hafa lært og þvegið, og strákarnir voru búnir í fótbolta í almenningsgarði, ætluðum ég og Elvar og Óliver og Christoph og Jaako Kári í dýragarð, en hann var lokaður og við fundum tívolí í staðinn. Veeeeiiiii! Ég elska tívolí. Borðuðum svo á ítölskum veitingastað, góða og safaríka steik. Nú sit ég pakksödd og þreytt og glöð. Allveg svakalega fínn dagur. Reynum að komast í dýragarð á morgun, en svo þurfa gestirnir því miður að fara heim með lestinni til Frankfurt annað kvöld. Þá spila ég líka á tónleikum annað kvöld á staðnum TIVOLI , Kopenhagenerstrasse 14, í Prenzlauer Berg. Það er spennandi, hlakka til þótt ég fái nú bara að taka tvö lög. Alein með kassagítarinn. Líka pínu stressuð, ekkert mikið samt. Ef vel tekst til fæ ég svo að spila aftur fyrsta laugardag í desember, og þá taka heilt tónleikaprógram, og fæ e.t.v. eitthvað aðeins borgað og svona!!! Ég þarf bara að massa þetta á morgun. Allir að mæta...

Christoph og Jako Kári eru komnir! Vei gaman að hafa gesti...langar að hafa gesti á hverjum degi. Hver vill koma og heimsækja Berlín? (ekkert að frétta sko)

Í dag fór ég að íhuga það sem einn vinur sagði við mig fyrir nokkrum árum: ,,Hvað ertu alltaf að læra svona Heiða? Veistu ekki að fólk verður bara heimskara á að læra of mikið?"...Ég hélt þetta væri bara einhver svona and-menntahroki, þ.e.a.s. fólk sem vill bara að menn vinni vinnuna sína, og séu ekkert að hanga í skóla endalaust...en ég er að skilja þessa setningu á allt annan hátt í dag. Mér finnst hreinlega eins og fólk missi stundum sína heilbrigðu skynsemi út í veður og vind við að hafa lært of mikið. Sem betur fer er þetta ekki algilt, því öll erum við jú mismunandi, og sumir missa ekki sjónar á sinni eigin persónu og sköpunargáfu og meðfæddum hæfileikum, þótt þeir læri smá. Ég vona allavega að ég geti verið smá ég sjálf eins og ég er áður en ég læri nokkurn skapaðan hlut, og litist ekki af faginu sem ég er að læra og verði að lokum talandi hrokaheimspekiuppflettiorðabók. Þessar glósur skrifaði ég í stílabókina mína í skólanum í dag: ,,Heimspekinemar eru svo margir hrikalega hrokafullir besservisserar. Alls staðar í heiminum er fólk sem þykist vita betur en einhver annar. Í stað þess að vinna saman í að vita meira, er fólk að þykjast vera klárara og slá ryki í augu annarra, tala gáfulega, búa til "andstæðinga"! Klekkja rökfræðilega hvor á öðrum. Þetta er ekki heimspeki fyrir mér, heldur heimska, eða stjórnmál...sem er stundum einn og sami hluturinn."
og svo held ég áfram...
,,Heimspekingarnir sjálfir eru sumir eins og rapparar dagsins í dag. Allir að kalla: 'Ég er bestur, hinir eru ömurlegir og sögðu ekkert af viti'. Heimspekinemar eru þó verri og eru eins og áhangendur rappara, að verja sína menn. Allir að skíta á hina til að reyna að koma sínum manni að."
Held ég fari bara ekkert í doktorsnám...

náttúruhamfarir og manndráp og sprengjuárásir og ég veit ekki hvað og hvað. Það er nú bara alls ekkert skemmtilegt við það, hvernig sem maður lítur á það. Það eina sem hægt er að gera í svona hlutum er að reyna að hugsa jákvætt og muna að við erum öll fólk sem býr saman í heiminum og eigum það sameiginlegt að fæðast og deyja. Allir eru menn, en allir eru líka mismundandi og eiga rétt á sínum skoðunum. Enginn má setjast í dómarasæti og vita betur um eitt né neitt. Það er oft og tíðum eitthvað sem á sér stað sem er erfitt að skilja og sætta sig við, en við verðum að reyna að hætta að fordæma og reiðast hvort öðru. Ef við reynum að einbeita okkur að því að elska annað fólk í kring um okkur, sama hvernig það er, þá erum við að minnka líkurnar á því að eitthvað slæmt gerist og auka líkurnar á að heimurinn verði að betri stað, sem allir geti sætt sig við að búa í. Ég legg mitt að mörkum með því að byrja á að brosa til allra sem ég mæti í dag, og þagga niður í röddum fordóma sem eru ávallt eitthvað að röfla um hitt og þetta. Verum góð hvort við annað!!!

finally..segi nú bara ekki annað. Netið er eitthvað óstabílt hér í húsinu og því var það niðri frá föstudegi til núna... fráhvörfin voru meiri en ég hélt, sakna helst að geta ekki skoðað blogg, skrifað blogg og hlustað og horft á RUV á netinu. Dáldið leiðinlegt að fatta að maður er svona húkkt, en á móti kemur reyndar að ég hef ekki horft á sjónvarpið í næstum 2 vikur, nema glefsu úr hinni og þessari teiknimynd með Óliver. Sjónvarpið sjálft er líka komið inní svefnherbergi úr stofunni og því er nú loksins hægt að lesa bækur, læra, og spila á gítar þar án þess að vera fastur í heimi og hljóði teiknimyndanna sem flæða nonstop úr tækinu. Rosalega mikill munur. Elvar færði þetta á laugardag, og íbúðin er hreinlega önnur eftir breytinguna. Gott að liggja í stofunni og lesa með daufa og notarlega birtu og laus við hátíðniískur sjónvarpstækisins í bland við teiknimyndatal á þýsku. Í gær vorum við í matarboði og partýi hjá Sunnu og Jónu. Þær skreyttu allt og tóku hallóvínþema partýsins mjög hátíðlega. Gengu jafnvel svo langt að skýra alla réttina á hlaðborðinu sínu satanískum nöfnum sem voru jafn fráhrindandi og maturinn var í raun ljúffengur. Ekkert nafnanna nógu fagurt til að hafa hér eftir, trust me!
Óliver sagði fyrsta óumbeðna orðið sitt á þýsku í lestinni í gær. Hann hélt á snuddunni sinni og sagði svo: "snudda er snúlla" spekingslegur á svip og stakk henni svo upp í sig. Mikið rétt, orðið yfir snuddu er Snulla, og borið fram með ú-i. Hann er bara að fatta þetta drengurinn. Morgun meiri aðlögun. Annar klukkutími sem hann er einn, og ef í lagi fáum við kannski að prófa að lengja þetta á þriðjudag.
Haukur Már passaði í gær, og var í miklu stuði þegar við komum heim, sagði að Óliver hefði sagst elska sig!!! Það er nú alveg frábært þegar börnin manns eru svona miklir sjarmörar...
Æ núna er ég hætt í bili að skrifa sögur um Óliver. Þarf að elda, þarf að ljúka síðustu síðunum af ritgerð. Þarf að baða mig, þarf að lesa smá.
Fórum í Mauer Park garðinn á markaðinn þar í dag. Ég og Óliver og Steffen hinn þýski og þar hittum við SunnJón og ég reyndi að böska. Gekk ekki vel þar sem Óliver stöðvaði mig með óskum um að vilja pissa og sjá hundinn og fá húfu og hlaupa í grasinu og s.frv. Held ég geri aðra atlögu þegar ég er ein, virkar betur...
Bless for ná

einhver karsten hringdi og bauð mér að spila á tónleikum þarnæstu helgi!!! Vinur hans (sem ég kannast ekkert við), sagði honum að reyna að fá mig til að spila...hann á vin sem vissi að einhver stelpa sem spilar á gítar og syngur og væri frá Íslandi væri flutt til Berlínar...takk fyrir. Afskaplega fyndið og skemmtilegt. Ég semsagt á að mæta þarnæsta laugardag með kassagítarinn og taka tvö lög til prufu, og ef honum finnst ég skemmtileg þá fæ ég gigg mánuði síðar. Hann er með svona singer/songwriter-kvöld fyrsta laugardag í hverjum mánuði, 3 manneskjur hvert kvöld. Égskalnúsegj'ykkur það, og hef hér með gert það. 3 nýjir linkar: sönní (berlínarskutla), djonní (berlínarbeib), og rjúpan!!! Komdu sæl litla rjúpa.

Mig dreymir um að eiga pening fyrir myndavél. Langar í ódýra eldgamla gamaldags myndavél á klink, og svo líka aðra sem er svona digital og hægt að láta myndir úr henni yfir á netið. Í tilefni af þessum draumum náði ég í myndaalbúm og setti eina sæta mynd af mér þar inn. Er ekki frá því að það sé best að byrja svona. Nú er kominn farvegur fyrir allar fallegu myndirnar sem ég ætla að taka, og því verður örugglega til peningur í afgang í næsta mánuði til að kaupa myndavél. Ódýrasta sem ég hef séð er á 59 evrur, en hún er digital með áræðanlega bara eins fáum pixlum í upplausn og hægt er (tveimur...), og svo er heldur ekkert gat sem hægt er að gægjast inní þegar maður er að taka myndina. Mér finnst það nú galli, sko. Er ekki vön því að horfa á skjá til að ákveða myndramma, og svo er maður ábyggilega svo skjálfhentur þegar maður getur ekki stutt vélina við kinnar og enni og svona...kannski venst þetta samt. En fyrir tæpar 80 evrur get ég fengið eina sem er líka með gægjugati. Svo fann ég myndavél á markaði frá DDR, með bæklingi og tösku og notast við 35 mm. filmur, og er með svona handstýrðum fókus og stilla ljósopstíma o.s.frv. Og hún kostaði 35 evrur!!! Eitthvað er nú samt erfiðara að hlaða þeim myndum inn á tölvuna sína. Dagdraumar mínir hljóða upp á eina af hvorri týpu, og svo get ég aldeilis byrjað að dokkjúmenta þessa stórkostlegu borg sem ég bý í. En fyrst...sofa smá. Ég er ferleg kl. hálffjegur að nóttu, allir sofandi og ég með galopin og glaðvakandi augu. Þannig er að ég dottaði sko í tæpan klukkutíma yfir gamalli vondri jackie chan-mynd, í kungfu-þemanu sem var á einni stöðinni hér. Vaknaði svo og horfði með öðru heilahvelinu á fræðslu um hvernig kungfu-myndir eru kóríógraffaðar og skoðaði ljósmyndasíður á netinu með hinu. Vakandi. vahahahahahahakandihhhhh!

Ég komst að því að ég er geimvera í dag. Málið er að mér finnst ég ekki vera beint stelpa, jú ég er náttúrulega stelpa eða kvenkyns, en ég er ekkert stelpuleg. Og ég er ekki strákur heldur. Ekki er ég lessa því ég er skotin í strák, og hommi er ég ekki því þeir eru einmitt margir hverjir að gera svoldið í því að verea kvenlegir. Ég er utan flokka, einhvernvegin. Hef alltaf verið það. Veit ekki af hverju. Fór að hugsa um þetta í einum fyrirlestrinum í dag, þegar ég skildi ósköp lítið og datt aðeins út. Man á táningsárum mínum hvað mér fannst alltaf merkilegt hvað stelpuvinir mínir höfðu eitthvað lítið fyrir því að vera heillandi með voða stelpulegt hár, og áttu svo svona týpísk stelpuherbergi, og lágu þar í stelpurúmunum sínum og töluðu stelpulega í símann og hlógu stelpuhlátrum....Ég veit bara ekki afhverju ég er ekki svoleiðis. Mála mig alveg stundum, en ég verð ekkert endilega stelpulegri þegar ég mála mig. Bara geimverulegri....Allt mjög skrýtnar pælingar. Svo bonda ég ekkert svo vel með týpískum stelpulegum stelpum, líklega aðeins betur með týpískum strákum. Bonda samt held ég best með unglingsstrákum...Kannski er ég bara unglingsstrákur, fastur í ungkonulíkama. Svei mér þá, er ekki til félag annarra ungkvenna sem eru unglingsstrákar? Bannað að hlægja, og endilega látið mig vita ef þið skiljið, eða hafið ráð

Alveg hreint ágætt að vera skólastúlka, er djö...er ég farin að sakna þess að rokka maður. Eða bara spila á tónleikum hvað svo sem það væri. Verð nú að taka rusk í að skipuleggja spilamennsku á götum úti. Við höfum bara þurft að hafa okkur öll við að ná pappírsflóði, og að díla við veikindin í fjölskyldunni, og ekki gefist tími í neitt svona extra. En pappírsflóð að klárast, og veikindi ei meir svo ég ætti nú að kýla á böskerí á föstudaginn. Þarf hreinlega að undirbúa mig líkamlega í vikunni, þar sem neglur vinstri handar eru í fyrsta skipti í mörg ár sjáanlegar (þá meina ég það er nokkurra millimetra hvít rönd, ekki klippt knallstutt), og svo er siggið eitthvað aðeins að fara....uss uss uss. Þetta er náttúrulega lélegt. Bara set mér það takmark að spila í hálftíma hvern dag til föstudags, þá er það komið. Annars var ég aðeins að spila í þarsíðustu viku, og samdi meðal annars stórfínt og skemmtilegt popplag. Þá eru 3 lög komin í heiminn á þessum tæpl. 7 vikum í Berlín. Í þau fáu skipti sem ég hef gripið í gítarinn hefur bara alltaf eitthvað frábært komið. Góður sköpunarkraftur hér, það er alveg greinilegt. Ég er líka næstum búin með ritgerðina, svona 2 bls. eftir eða eitthvað. Aðeins að púsla endann, og gera heimildaskrá. Það er ljúft, held ég fari samt snemma að sofa og vakni fyrir allar aldir og þambi kaffi, og klári þetta þá. Ég nebblega tók hina aðferðina í gær. Fór um kvöld á kaffihús og sat og þambaði kaffi og lærði, og þá gat ég ekki sofnað fyrr en um 3-leytið, og vaknaði við að moskítófluga sem ýlfraði í myrkrinu kl. 5 var að reyna að drekka úr mér blóðið. Ég er afar óhrifin af þessum flugum, síðan ég bjó í Marseille, og þróaði með mér ofnæmi fyrir þeim, vegna gífurlegs fjölda bita sem ég fékk. Elvar heldur samt að þetta hafi bara verið ávaxtafluga að syngja, en ekki moskító, en það hefur verið svo hlýtt í nokkra daga, að hvað veit maður. Allavega ég vakti þar til hún var örugglega farin burt, því ég vildi ekki að hún biti mig, þá hefði ég bólgnað út og tvöfaldast. Datt út af fyrir 6, vaknaði kl. 8:00 M y g l u ð... góður dagur samt, sko!

ég og óliver fórum í partýið í gær, stórfínt, og hann t.d. hámaði í sig harðfisk, og svo prófaði hann hjólabretti og er búinn að ákveða að hann vilji þetta og ekkert annað. Svo var bara um 16 stiga hiti og logn þegar við vorum að rölta heim upp úr hálf ellefu um kvöldið. Útlandaveður í útlandinu. Ég klippti líka Elvar í gær, og fékk pöntun áðan frá Hrafnkeli um að klippa hann líka, og hann ætlar að lána okkur plötuspilara í staðinn. Skólinn byrjar á morgun, og í tilefni af því ætla ég nú að reyna að ljúka ritgerðinni í kvöld. Þá er ég nefnilega að fara að læra eitthvað nýtt, og eins gott að hætta að hugsa um Descartes á meðan. Er á leiðinni út á kaffihús til að klára dæmið. Það verður súper. Skóliskóliskóli...jibbískibbídú

ævintýralegt og skemmtilegt líf. Allt í einu er allt fullt af skemmtilegu íslensku fólki sem heimtar að bjóða okkur í mat. Haukur og Stefán buðu okkur í pítsu í gær og þar sem endranær gerði Óliver stormandi lukku, og vorum við í marga klukkutíma í spjalli og stemmingu. Erik samheimspeki- og erasmusnemi ætlar svo að halda partý með íslensku þema í kvöld. Hann var að flytja í nýja íbúð, og að því tilefni býður hann erlendum vinum upp á "ógeðslegan íslenskan mat", og sýður líka pasta til öryggis. Þessi ógeðslegi matur samanstendur af hákarli, sviðasultu harðfiski og lifrarpylsu og blóðmör, og brennivín er drukkið með. Nokkrir íslendingar fá líka að mæta, og taka út viðbrögðin hjá erlendu tilraunadýrunum. Nema ég ætla að sjálfsögðu að borða smá hákarl, enda geri ég ráð fyrir því að af honum verði afgangur...ég og Óliver fílum hákarl. Svo kom Hrafnkell í heimsókn í dag, og er verið að plana ferð á útimarkað á morgun. Ég læri svo aðeins með hléum og svo er helgin búin. Mánudagur ber í skauti sér nýtt upphaf á aðlögun sonarins í leikskólann sinn, og svo hefst kennslan í skólanum okkar líka. Ekki seinna vænna, allir löngu tilbúnir að læra spá. Vikan verður góð, en helgin núna er það nú líka. Sjáumst!

Sól í Berlín, og fyrsti skóladagurinn upprunninn. Fór í Humboldt í Trúarheimspeki Schelling í morgun kl. 8, og við það eitt að stíga inn í bygginguna helltist einskær gleði yfir mig. Fann herbergi 241 á löngum austurþýskum gráum gangi sem ég sver að mig hefur bara dreymt eða eitthvað. Hann er allavega nákvæmlega eins og ég ímyndaði mér að skóli í Berlín ætti að vera. Technishe Universitat er eitthvað svo hannaður og stór og undarlegt andrúmsloft. Þessi bygging Humboldt er hins vegar eins og fangelsi, á mjög skemmtilegan og sjarmerandi og hráan hátt. Þetta var svona heimspekilegt fangelsi: Fjötraðu líkamann og frelsaðu sálina!!! Allavega, ég flaug út, og þá bara komin glampandi sól og hlýtt veður. Nú þarf ég að hvíla mig aðeins áður en ég hefst handa við að finna Freie Universitat, en hann er víst í um klukkustundar fjalægð eða eitthvað með lest, og þar er fyrirlestur um inngang að trúarheimspeki á 20. öld milli 4 og 6 í dag. Ég er dugleg...
Svo fann ég Sonic Youth lagið sem ég hef verið með á heilanum í sirka 2 mánuði: Það er á plötunni Dirty og heitir Purr.
Og ég komst að því að heimspeki er náttúrulega bara pönk, ekkert annað. Maður lærir að brjóta reglurnar því annars gerist ekkert!!!

...og þetta er einfaldlega skemmtilegasta dægradvöl sem völ er á!!! (sá'etta hjá drekabetu, takk!)

Heyja..
er komin með skírteini sem veitir mér þann unað að borga ekki í nein samgöngutæki þar til í marslok 2005. Þá verð ég að borga fyrir sumarönnina í T.U. , og endurnýja unaðinn. Digital-myndataka var ókeypis og fékk maður bréf með "kóda" (eða strikamerki þ.e.a.s.) sem maður setti á þar til gerðan skanna á ljósmyndakassa og svo fékk maður 2 tilraunir til að vera sætur. Fyrri tilraun: sást ekki í andlitið á mér, bara höku og niðrúr...Ókey reynum bara aftur...Flott nú vantaði bara ofan á hausinn frá enninu og upp...verður að duga, því ekki fékk ég að prufa aftur að vera sætari. Svo sendist þessi mynd inn á kortaframleiðsluskrifstofuna og ég hljóp þangað og náði inn 2 mín. áður en lokaði. Maðurinn í afgreiðslunni var mjög almennilegur og kurteis þegar hann sagði mér að það vantaði eitthvað í hausinn á mér/af hausnum á mér. Jú, ég gekkst við því og spurði hvort það væri ekki bara persónulegra þannig. Þá hló hann og afhenti mér skilríkið. Til hamingju!
Ég er semsagt að læra að vera fyndin á þýsku...djöfull er það gaman, maður.

Úff, ævintýri næturinnar voru frekar átakanleg. Herra Óliver Elvarsson vaknaði um hálf-tvöleytið með blæðandi boxaramunn, og sjónin var svo átakanleg að ég hringdi beint í grei-mömmu og hræddi hana áræðanlega...fyrirgefðu! :-) En hann fékk mjólk að súpa og sofnaði strax aftur sem betur fer. Í dag lítur hann út eins og handboltamaður með í vörinni, og talar eins og Bubbi Morthens...Læknirinn sem við hittum áðan sagði að hann gæti smitað út vikuna, og því megum við ekki fara aftur með hann í leikskólann fyrr en næsta mánudag. Úúúff, segi ég enn og aftur. Það er ekkert vííííí að vera með vírus, greinilega. Svaf svo ekki nema 5 tíma, því ég var svo glaðvakandi eftir að hafa séð barnið alblóðugt, að adrenalínið flæddi um líkamann og blóðið mitt þaut á 200 km. hraða. Náði ekki að róa mig fyrr en um hálf-fjegur í nótt, þá hafði ég lesið Cartoons in der DDR í soldinn tíma. Frábærar myndasögur, allar alveg stútfullar af einhverju sem mátti ekki segja, skrifa né hugsa í gamla Austur-Þýskalandi.Mjög róttækt og skemmtilegar ádeilur. Elska bókasafnið...greinilegt að sumt er eins hvar sem maður býr. Alltaf gaman að lesa góðar bækur, allsstaðar!!!!
(jógúrt dagsins: með bragði af grænum eplum og lime....nokkuð gott)

er að borða enn eitt undursamlegt jógúrt með framandi bragði, hér í hinni ágætu borg berlín. Í dag er ég að smakka jógúrt með ananas og vatnsmelónubragði! Af hverju hefur enginn á Íslandi í jógúrtbransanum hugmyndaflug í svona nokkuð? Ég íhuga að safna miklum heimildum um góðar bragðtegundir jógúrta, og leggja á mig heilmikla rannsóknarvinnu meðan á dvöl minni stendur, og sækja svo um stöðu á hugmynda-og bragðþróunarskrifstofu M.S. Þar vantar greinilega nýtt og ferskt hugmyndaflug. Barnið okkar enn veikt, komin tæp vika. Læknisskoðun í gær leiddi í ljós að hann væri með herpesvírussýkingu, allur í sárum kring um munn, og bólgnar varir. Elvari fannst hann líta út eins og leikkona með misheppnaðar sílikonvarir! Nú er bara spurning hvort þetta er smitandi, og hvort öll fjölskyldan verður með leikkonuvarir í næstu viku? En þeir sem vit hafa á (mamma...kannski þú) gætu nú kommentað, og frætt mig um smithættu herpesvírussýkinga, og hvort ráðlegt er t.d. að fara í barnaafmæli á morgun, sem okkur er boðið í. Klara býður okkur í afmæli, sem hún er að halda upp á aðeins of seint, en hún er fædd 21. september 2001...alveg eins og Óliver!

Það er eitthvað undarlegt við að ferðast um með neðanjarðarlestum. Maður er rétthjá fullt af fólki, en eins langt frá því og hugsast getur. Allir að passa sig að rekast ekki í, að sýna ekki of mikil svipbrigði, og að halda einhvernvegin "grímunni" sinni. Ekkert ósvipað og tannlæknastofufílingur, en alltaf einn og einn sem brýtur þetta upp. Ég headbanga stundum við viðeigandi tónlist í ferðaspilaranum, bara aðeins smá, og finnst ekkert mál að verða fyrir augngotum fyrir vikið. Sáum stúlku bresta í grát um daginn, bara upp úr þurru. Hún fór út á næstu stöð, meikaði þetta ekki. En í dag voru 4 litlir strákar á aldrinum 7-12 einir í lestinni. Þeir voru kannski bræður, kannski vinir, en allavega í ofsa stuði og með geðveikt mikla orku. Hoppuðu út um allt og sveifluðu sér í stöngunum. Létu vægast sagt öllum illum látum, og allt í góðu. Hoppuðu úr tómu sæti niður á gólf meðan lestin var á hreyfingu. Fóru næstum yfir strikið en voru greinilega öllu vanir, svo þessi minnsti lét mikið yfir sig ganga og svaraði bara í sömu mynt, og fór ekkert að skæla eða neitt þegar einn stal af honum öðrum skónum. Ég var að hlusta á Singapore Sling, nýja diskinn, og þetta var bara frábær skreyting við það, og ekkert að bögga mig nema síður væri. Ung kona á móti mér var greinilega á sama máli og ég, og brosti bara og hristi hausinn,...þessir litlu krakkar eru nú alveg ótrúlega sæt og orkumikil. En konan við hliðina á mér stóð upp og fór, eftir að hafa skammað strákana fyrir læti. Hvað er eiginlega málið? Hún hefur líklega ekki hlegið upphátt í fjöldamörg ár, og kann ekki að vera afslöppuð gangvart því að fólk bara sleppi sér aðeins. Börn eru svo góð í að sleppa sér, ekki enn búið að skilyrða þau til að vera alltaf yfirveguð og róleg. Ég meina, hvað er eiginlega eftir ef það má ekki hafa smá fjör þegar maður vill? Eitt af því fáa sem þjóðfélögum heims hefur ekki enn tekist að skattleggja. Stöndum saman, og búum til meira fjör og læti! Við megum það alveg!

ví o li i jellosoboris hljómar hér um íbúðina, og líka ó-geðná, en þessi lög er bæði að finna í Gula Kafbátnum, og pilturinn og sjónvarpssjúklingurinn Óliver er með textana á hreinu. Hann er lasinn bæðevei, svo engin aðlögun í nýjaleikskólanum í gangi. Bara teiknimyndir allan daginn. En greyið er með hita og beinverki og svaka lítill í sér. Byrjaði uppúr hádegi á mánudag, og nú eru því bráðum komnir 2 sólarhringar. Þurfum að láta lækni kíkja á hann, hann er hundveikur litla skinnið. Ég ætla að labba við hjá lækni sem er hér handan við hornið og skoða hvort hann geti komið í vitjanir eða hvort við þurfum bara að mæta með hann eða hvað? Svo er það eilífðarverkefnið RITGERÐ. Það fyndna við þetta er að ég er alltaf í stuði til að læra og skrifa og klára þetta á daginn, en undantekningalaust er eitthvað sem þarf að gera,...(þvo, kaupa inn, stofna bankareikn, finna lækni..), og svo þegar kvöldið kemur þá er ég svo þreytt eftir allt stússið og reddingarnar og lestarferðir og labb að ég hef enga læruorku eftir. Skrifa ritgerðarleysi (á samt bara 6 bls. eftir) á þetta og ekki á mig! hehehe

Er eitthvað slöpp við að halda vaknámorgnanna sofna miðnætti rútínu. Fékk mér bókasafnsskírteini hér í Berlín og tók fullt af teiknimyndasögum fyrir fjölskylduna, og er nú búin að lesa Bláa Lótusinn og 2 Ástrík-bækur, og glugga í Teiknimyndir frá DDR. ALLT Á ÞÝSKU!!! Þetta er náttúrulega frábær aðferð til þýskunáms, og aldeilis yndælt þegar ég get ekki sofnað á kvöldin/nóttunni. Ástríkur og ég vorum vakandi til 3 í nótt, og það var nokkuð fínt. Óliver lasinn, fór ekki í nýja leikskólann í dag, þri. Það verður bara að hafa það, þótt aðlögunin klippist í sundur. Stofnaði bankareikning í gær. Það þarf 9 undirskriftir til að fá bankareikning... veit ekkert hvað ég var að skrifa undir. Líklega víxla fyrir bankastarfsmanninn sem var svo nýbyrjaður að vinna úti, að hann býr líklega ennþá hjá foreldrunum sínum, og talar engin tungumál nema þýsku, og þekkir ekkert sína eigin borg. Þurfti að spurja mig í hvaða hverfi ég byggi út frá póstnúmerinu... en meira að segja ég er búin að læra að öll póstföng sem byrja á 104 eru Prenzlauer, 101 Mitte...og s. framv. Gaurinn var 18 ára ég sver það...Og skíthræddur við að slá eitthvað vitlaust inn í tölvuna sína, og klúðra pappírsflæðinu. Æj, þetta pappírsflóð er nú bara fyndið. Er á leið út að læra. Vonandi kemur eitthvað skemmtilegt og óvænt fyrir.
Nýr linkur: Drekabeta

Gunnar litli Hjálmarsson toppar sjálfan sig í hressleika í nýjustu skrifum sínum á bloggi. Mjög upplífgandi og kátínuvekjandi og því vel við hæfi að mæla með því á hér á skemmtilegt.

Í dag er góður sunnudagur. Viðburðaríki gærdagsins var með ólíkindum. Fórum aðeins út að labba eftir að hafa haft það náðugt við lestur bóka, og teikningu mynda og áhorf teiknimynda. Gengum í góða veðrinu niður á Rosenthaler Platz, þar sem við keyptum smá franskar og eitthvað nasl, svo fórum við í gamaldags-analog- svarthvítan ljósmyndakassa sem þar hefur verið komið fyrir. Fyrst fór öll fjölskyldan, og kámugt tómatsósuandlit Ólivers nýtur sín mjög vel í svart/hvítu. Svo voru teknar árvissu kærustuparsmyndirnar, og ég verð að segja að við verðum bara sætari og sætari, hlýtur að vera þýska mataræðið... Svo var ferðinni heitið í innflutningspartý hjá Eirúnu og Magga, á Torstrasse, en þaðan fórum við heim um 10. Þá komu Andrés og Rúna og fengu að passa fyrir okkur. Við Elvar, ásamt Sunnu og Jónu fórum hins vegar á langþráðan, velumtalaðan og stórfínan goth-stað sem er hér í nágrenninu. Hann stóðst allar væntingar og gott betur, og er nú minni nýji uppáhaldsstaður. Að lokum löbbuðum við aðeins meira um og enduðum kvöldið á því að borða vel útilátið og gómsætt kebab. Gaman og skemmtilegt og þökkum við Andrési og Rúnu kærlega fyrir

je

þá er kominn sjöundi, og við erum ánægð með það. Einhverntíma um þessar mundir eru komin 5 ár síðan ég og Elvar urðum kærustupar, og það hefur svo sannarlega margt gerst á þeim árum. Við þurfum að finna ljósmyndakassa til að taka mynd, því við höfum gert það á hverju ári, og eigum því passamynd af okkur frá þessum tíma árs frá öllum árunum. Fjórar myndir til, sú fimmta á leiðinni. Tek yfirleitt ekki mikið af myndum því ég á ekki myndavél, en þessar myndir skipta máli. Ætla reyndar að skoða hvort ég geti ekki fundið ódýra digitalmyndavél, því mig langar til að festa á pixla það sem fyrir augu ber hér í Berlín. Það er svo margt sem væri gaman að eiga í framtíðinni, til minja um dvölina hér.
Prófuðum að borða á veitingastað frá Sri Lanka í gærkvöldi. Listastúlkurnar Sunna og Jóna og verkamaðurinn Elías snæddu með kjarnafjölskyldunni og voru allir sáttir með Sri Lanka. Þar smakkaði ég eðal indverskan bjór sem heitir Cobra, og svo fékk ég mér Lychee-mjólkurhristing í eftirmat. Aðalréttur var úr bananafjölskyldunni, ristaður á pönnu með rauðum kókos og grænmeti og karrýgumsi.... mjög spennandi matur og verulega ,,losandi".

...síðan gerðist það að ég fann kaffihús sem var líka þvottahús. Hvílík snilld. Drakk latté, þvoði og þurrkaði, las Descartes, og ætla nú að massa ritgerð næstu daga. En ég samdi líka ljóð á kaffihúsinu, og er að safna í ljóðabók, sem ég auglýsi hér með eftir útgefanda að. Afar gott stöff sko. Elvar og Óliver komu og hittu mig með hreina þvottinn og hreinu samviskuna (búin að þvo og læra í dag). Við fundum Sushi-stað sem heitir að mig minnir Risen-kugel (eða eitthvað í líkingu við þetta, og þýðir væntanlega hrísgrjónakúla). Frábær matur, og Óliver borðaði misósúpu með bestu lyst. Fúlsaði reyndar við sjálfu sushi-inu, en það er nú líka ,aquired taste", sem þriggj'ára er ekki alveg búinn að stilla sig inná!

kynntumst danskri stúlku, Dorte. Kaffihús, smá hangs. Finnst gott að gera eitthvað með einhverjum sem tilheyrir ekki fjölskyldunni. Nú er hvíldartími hjá feðgum, ég ætla að þvo þvott og læra Descartes. Pósthús líka, smá dund sona. Gott veður. Sól og hiti. Kannski kaupi ég ís...Uppáhaldsbragð: Pistasíuhnetu...MMMMMM

í dag, mánudag, var sem minnst gert. Ætluðum að skrá okkur í skólann en vorum svo lengi að koma okkur af stað með ýmsum töfum, eins og að klára teiknimyndina sem var í sjónvarpinu, og brjóta kaffikönnuna svo hella varð upp á annað kaffi í esspressóvélinni, að við komum kl 12:37 upp í háskóla, 7 mínútum eftir að allt lokaði!!!! Svo fundum við engann banka sem var ekki bara hraðbankakassar og því fór út í veður og vind (sem var reyndar gott í dag) að reyna að stofna bankareykning. Svo toppaði ég tilgangsleysið og athafna/framkvæmdaleysið með því að fá mér margumtalaðan frappuchino á Starbucks, og hann fór eitthvað svo illa í mig að ég bara varð hálf veik. Hvað er eiginlega gott við sykurleðju og gerfirjóma með kaffibragði, og svo var þetta svo íssssskalt að mér leið eins og ég væri bara veik. Flökurt og þreytt og orkulaus. Drifum okkur því bara heim og lögðum okkur, og því eru endalaust mörg verkefni dagsins í dag komin yfir á daginn á morgunn. Banki: stofna reikning, Pósthús: áframsenda til Davíðs, Skóli: skrá okkur, Leikskólaskrifstofa: fara með síðustu pappíra.
Já, eitt gott sem gerðist á sunnudagskvöld: Horfðum á School of Rock. Hún er sjúklega góð!! Besta mynd sem ég hef séð lengi, lengi lengi, lengi lengi lengi! Lengi. Kannski verður maður að vera rokkari samt til að fíla hana. Veit ekki. Eða barn í anda. Eða rokkari sem er barn í anda!!!!!!!! En ég er það einmitt, svo þetta er mín uppáhaldsmynd núna. Best að horfa á hana aftur áður en ég þarf að skila. Rétt upp hend sem hefur séð hana...

erum á leið á markað rétt hjá. stopp í bakaríi og eitthvað labb og svona. Annars gæti allt verið brjálað í mótmælagöngum, var ég að frétta, og því ekki víst með markaði í dag. En látum reyna á það. Verið að mótmæla breytingum á félagslegukerfi, til hins verra. Þetta er þjóð sem lætur heyra í sér ef þeim líkar ekki breytingar til hins verra.....Til athugunar hjá íslendingum sem eru ætíð að láta draga sig nær og nær þriðjaríkis-ástandi...

Er alveg að fara að sofa en ákv. að segja ykkur fyrst frá því ógeðslega skemmtilega sem ég gerði á fimmtudagskvöld. Ég hafði lengi ætlað að prufa sundlaug í berlín, en hún er smá spöl frá heimilinu, svo ég skellti mér bara í gufubað til að reyna að ná úr mér veikindum. Er alltaf orðin viðþolslaus á öðrum degi veikinda. Vissi um gufubað á Rykestrasse, sem er í 5 min. göngufæri, og fann númer þeirra á netinu og hringdi svona til að tékka á verði, opnun og hvað ég þyrfti að taka með. Afar almennilegu piltur svaraði mér, jú það er opið til miðnættis. já það eru 6 evrur fyrir klukkustund, en dýrara ef þú kemur ekki með handklæði. Nei, þú mátt alls ekki koma með sundföt með þér, þetta er nefnilega allsber gufa!!! Noh, þaðernebblegaþað. Ég er nú ekkert allt of spéhrædd, hef meira að segja farið einu sinni í sturtu fyrir bæði kynin (í Kristianiu árið 1995, Valgeir þorði ekki, svo hann beið fyrir utan...hahah), þannig að ég skellti mér bara. Allt til að reka burtu illa sýkla. Í gufubaðinu fékk ég einn sýnirúnt, því svo þurfti ég að fjarlægja gleraugun og með því sjónina líka. Þarna er allt sameiginlegt: Einn búningsklefi, 2 sameiginlegir sturtuklefar, og 3 gufuböð. Einn 60 gráðu eucalyptus-gufuklefi, 85-gráðu gufa, og loks finnskt gufuhús sem er kynnt upp í lágmark 100 gráður. Það er úti í afmörkuðum og lokuðum bakgarði, og fullt af bekkjum og stólum og einni vaðlaug o.s.frv. Svo er einn kaldi pottur (að finnskum sið líka). Mér fannst nú soldið skrýtið að klæða mig úr, og fór nú á nærbuxunum inn á klósett, fór þar úr restinni af fötunum og vafði mig stóru handklæði. Svo kom að sturtunni og þá var ekki aftur snúið. Ég lemti strax í sturtu milli tveggja karlmanna, og svo bara rúllaði boltinn áfram. Gufurnar voru stórfínar, og er ég hálf fegin að hafa verið gleraugnalaus því þá veit ég minna um hvort einhver var að horfa á mig eða ekki. En eftir smá tíma vandist þetta afskaplega vel, og ég var alveg sallaróleg að tína á mig spjarirnar á leiðinni upp. Ég gaf mér líka tíma til að fara á barinn og valdi mér þar epla/kirsuberjasafablöndu. En þar var hægt að fá um 20 mismunandi ávaxtasafa, og einnig bjór og vatn. Mjög merkileg reynsla, og ég held ég fari barasta aftur. Kannski ég noti linsurnar í næsta skipti....

leiðist....

jæja, nú er ég lasin, svo ég er búin að vera að lesa blogg hjá hinum og þessum í allan dag. Bætti við tveimur linkum, hjá pönkaravinum. Vantaði smá meira pönk í þetta. Á morgun verður mér batnað, en í dag er ég með hálsbólgu og verki út um allan líkama. Ætla að ljúka við bókina Góðir Íslendingar eftir Huldar Breiðfjörð. Hún er prýðileg, sérstaklega gott að lesa hana þegar maður er ekki á Íslandi, það er nefnilega svo mikið um veðurlýsingar í henni. Íslenskt veður, nei takk!

hadló adlir. Ég er soldið orðlaus, en langaði að segja eitthvað smá. Í gær lærði ég til hálf 3 um nóttina og sofanði 3 og vaknaði 8 til að fara í skólann, svo ég svaf fimm tíma... eins og Lára var að lýsa yfir að hún gerði venjulega þessa dagana. Ég er ekki sátt við árangurinn, þetta er ekki fyrir mig. Auðvitað gott að læra á nóttunni, í raun eini tíminn sem gefst næði hér heima, en þá þarf ég líka að sofa til hádegis daginn eftir...pjúfff flókið. Mér skilst að Ghandi hafi alltaf bara hallað sér í 2-3 tíma á nóttu. Þá væri ég nú búin með síðustu ritgerðina mína, ef ég væri Ghandi. Ég er að spá í að halla mér fljótlega og ath. hvort ég geti vaknað fyrir allar aldir á morgun (kl.7), þ.e.a.s. áður en restin vaknar og hefur læti og fjör. Þá get ég massað þessa ritgerð og búið spil og úr sögunni. Það er sko frí í skólanum á þriðjudögum hjá mér, þannig að á morgun er heimspekidagur. Annars gerðum við helling um helgina. Fórum í dýragarðinn á sunnudaginn, og sáum alls konar fín dýr, apa og gíraffa og fíla (sem kúkuðu svo stórum haug af kúk að ég held bara að það hafi verið tugir kílóa). Kannski svona sirka ein Heiða af fílakúk.... Svo í dag (mánudag, sko) fórum við að ósk Ólivers í double-decker bus að skoða Berlín. Tveggja tíma rúntur og stoppað hjá 14 mikilvægum stöðum og byggingum. Óliver vakandi helminginn og mjög lifandi í þessari ferð. Böggaði samt engann því allir voru með heddfón á hausnum að hlusta, og misstu því af lögunum sem hann var að syngja um það sem fyrir augu bar. Svo sofnaði hann í kjöltunni minni, þessi elska! Elvar fór svo á tónleika á sunnudagskvöld með amerísku hljómsveitinni The Paperchase, og lét mjög vel af. Tónleikarnir voru í Kreutzberg, dáldið tyrkjahverfi sem er víst æðislegt. Ég þarf að fara þangað við fyrsta tækifæri og skoða. Skoðunarferðin í dag var frábær, því maður fékk smá tilfinningu fyrir stærð borgarinnar, eitthvað sem maður skynjar ekki nógu vel þegar maður ferðast með neðanjarðarlestum. Bla bla bla,,,,,nenni ekki meiru. Hver vill passa á fimmtudagskvöld svo ég og Elvar komumst tvö ein út í bíó?

Ókey...Genesis P. Orridge sem er aðalkallinn í Psychic TV er kelling!!
Ég sá á honum brjóstin í gær. Mig rámar eitthvað í að hafa heyrt af þessari kynskiptiaðgerð hans, en var hins vegar búin að steingleyma því þegar hljómsveitin steig á svið í gærkvöldi. Upphitunarbandið To Roccoco Rot var aðalástæðan fyrir því að ég vildi á tónleikana, en ég á eina plötu sem Gunni gaf mér fyrir nokkrum árum, og fíla ég einstaklega vel. Þeir eru þrír listaspíruþjóðverjar, líta allir út eins og litlu frændur Blixa Bargeld, en samt einhvernvegin heilbrigðari í útliti. Ég var sem dáleidd í þær 40 mín. sem bandið spilaði og allt var í sómalagi. Hefði þess vegna getað farið þá, bjóst svo sem ekki við neinu af seinna bandinu, því jafnvel þótt fyrri plötur þeirra hefðu verið tilraunakennd snilld hafði ég heyrt eina sem kom út 95 eða 96 sem var mjög leiðinleg danstónlist og alveg týpísk svona e-pillupartýleiðindi....Hvað um það, ég sat sæl og glöð á hörðu trégólfi Volksbuhne, (gamalt leikhús í austur-berlín), og svo bara byrjaði fríksjóvið. Lessuleg bassastelpa, sem var með fráhneppta skyrtu niður í nafla, (þrusubassaleikari), pönkaratrommari með hanakamp, hommi á hljómborð sem var að nudda sér upp við hljómborðið á mjög ögrandi hátt allan tímann, og endaði með nærbuxurnar á hælunum, robert smith-lookalike á gítar, icequeen sem var stífmáluð í minipilsi og háumhælum og skipti ekki um svip allan tímann á trommuheila og laptop, og theraminleikari í síðustu lögunum. Þetta var bandið. Genesis P. leit hins vegar út eins og fimmtug kelling sem verslar fötin sín í Hagkaupum, með aflitað kellingahár, sjúskuð og komin með pínu bjórvömp, í gallaminipilsi og flegnum bol sem sýndu brjóstin hans ágætlega!!!!!! Tónlistin var misgóð, á köflum smá pönk og drungi, annað soldið hressilegt léttpopprokk eitthvað, næstum eins og kolrassakrókríðandi einu sinni, en nýjustu lögin voru bara næstum eins og Velvel Underground. Ekki mjög frumlegt, verð ég að viðurkenna, en viðeigandi var'ða. Tæpir tveir tímar af fríksjóvi, og á meðan var verið að sýna alls kyns rugl á risabiótjaldi á bak við þau. Meðal annars sýnt þegar Genesis P. fær sér sílikonsprautu inn í varirnar til að verða meira "sexí" (lesist kellingalegur). Ó já ég gleymdi, hann er búinn að skipta öllum tönnunum sínum út fyrir gulltennur, en úr fjarlægð og með ljósunum kemur það vægast sagt illa út, eins og hann sé bara tannlaus. Þannig að þessi fyrrum maður, lítur nú út eins og tannlaus drusluleg ensk miðaldra kelling, og svo syngur hún með karnmannsröddusinni.....Vá.....ég er rosalega glöð að hafa séð þetta

er á leiðinni á tónleika sem er reyndar uppselt á, en ég ætla að standa fyrir utan og redda miða. Hljómsveitirnar Pshycic TV og To roccoco Rot spila. Ég fer ein því það er bara rugl að reyna að finna einhvern með sér. Við þekkjum næstum engan, og engin barnapía, enn að minsta kosti. Því verða skemmtanir að vera eins manns verkefni hér í stórborginni. Elvar fer svo einn eitthvert, kannski á Slayer á sunnudagskvöldið. Verðum að redda barnapíu bráðum, það er dáldið einmannalegt svona...

http://www.hardkjarni.com/photo/?display=DYS%2FSjonvarpshusid_281102-eva%2FDYS9.jpg" alt="Example" />

Nú er ég hálfnuð með þýskunámskeiðið mitt, og finnst ég bara orðin nokkuð lunkin. Get skammlaust lesið fyrirsagnir í blöðum, og einstaka greinar þar sem innihald er um eitthvað af þeim orðum sem ég kann. Eins og á mið. í einhverju Berlínarblaðanna, þá var heillöng grein um Herbst, sem þýðir haust, og ég held alveg að ég hafi bara skilið það. Þetta sama kvöld, miðvikud.kvöld, fórum við svo loksins í bíó, en þar sem Óliver var að sjálfsögðu með fórum við á hina stórkostlegu mynd Twei Bruder (tveir bræður). Það er dýralífsmynd, en með söguþræði.Bræðurnir eru tígrisdýrastrákar, og þetta var prýðismynd. Á þýsku auðvitað, og Óliver skildi söguþráðinn vel, og ég held ég bara jafnvel. Svo þýddi ég official enskt skjal um að við værum nem. við H.I. og erasmusnemar yfir á þýsku (með hjálp orðabókar). Vona bara að þetta hafi ekki verið eitthver "Hotspring river this book, I river cock"-þýðing.



" alt="Example" />

Er að prófa hvort þetta virkar hér, að blogga myndum sem maður finnur á netinu.
virkaðu...plíssss (þetta á að vera mynd af mér með gítar...)

brrrrrr, íslenskt skítaveður í berlín. Ég er að mana mig upp í að fara út í vind og raka og kulda, en á að mæta í skólann eftir um klukkutíma. Gott að lesa blogg og blogga á morgnanna með morgunmat og te. Það er greinilega allt á öðrum endanum á Íslandi vegna kennaraverkfalls, sé ég, og votta ég foreldrum hvers líf fer úr skorðum samúð, en sendi jafnframt baráttukveðjur. Ég er að spá í að fara í allar peysurnar mínar (tók 3 og svo 10 stuttermaboli með eins og asni). Ég held að ég hafi ruglast þegar ég pakkaði niður og fannst ég væri að pakka fyrir Spán. Óliver vaknaður...heimtar axlabönd á náttbuxurnar af því að þær eru aðeins of síðar, hélt þær væru að detta niður um sig. Hann átti afmæli í gær, og fékk að fara á alvöru gamaldags leikbrúðusjóv. Kostaði fullt, en var bara nokkuð gott. Sjö karakterar, og allir mjög sannfærandi, meira að segja nokkrir prumpubrandarar sem þýsk börn kunna ekki síður að meta en íslensk. En ég tók eftir einu. Þegar svo allt var búið og þýsku börnin voru að leika prumpubrandarana prumpuðu þau ekki eins og við íslendingarnir, þ.e.a.s. með tunguna út og láta vaða. Neeeei, þau prumpa með vörunum, já sko ég get það ekki einu sinni alveg. Meira svona eins og að spila á trompett, ekki að herma eftir lofti úr endaþarmi.....Mjöööög merkileg menningarstúdía. En nú held ég ég hlaupi í neðanjarðarlestina.

Í dag var haldið niður í bæ í vestur-berlín, á Potsdamer-Platz. Ég og Óliver skoðuðum smá í gær þar, og komust að því að það var barnahátíð sunnud. 19. sept. Þannig að fjölskyldan dreif sig öll í dag. Hælætin voru: Barnakór sem var svo væminn að ég fékk ógeðshroll og gæsahúð og næstum tár í augun, en þetta hvar hvorki frábært eða ömurlegt. Óliver elskaði kórinn og fékk póstkort með eiginhandaráritunum allra krakkanna. Svo fengum við ís, og fengum að ,,veiða" járndrasl, eins og dósir og batterí og fleirra, með segulveiðistöngum. Það var í boði endurvinnsludeildar Berlínar, og börnunum kennt að flokka draslið í mism. ruslapoka í leiðinni! Svo varð óliver þreyttur og vildi fara heim, en það var endalaust mikið hægt að gera og margir krakkar, og allt frekar dýrt. Þarna fékk óliver litla blöðru og við borguðum 3 evrur fyrir. Það hljómar næstum íslenskt verð, en þetta er eitthvað um 250 kall. Mjög gott að stíga út úr neðanjarðarlestinni og vera kominn til Austurberlínar aftur. Allt rólegra og ekki króm og gler. Svo datt eitthvað kubbadót sem óliver var að byggja í gólfið og hann sagði hátt og snjallt ,,ANDSKOTANS"!!!!!! ég hló og hló og spurði hver hefði sagt svona, og hann sagði ,,Pabbi minn" og brosti út að eyrum. Hann er yndislegur!

Fór í miðlungs-hópinn í þýskunámskeiðinu, eins og ég bjóst við. Fékk held ég eitthvað sirka 7.5 eða 8 í prófinu sem við tókum á mánudag. Og ég var í rúma sex klukkutíma í þýsku í dag, dáldið búin að drekka í mig. Með þýskusvamp í heilastað núna. Kennt mán. mið.fim. og fös. frá 10 til 13:30. Þrjár og hálf vika eftir, þrjár og hálf vika til að læra nógu mikla þýsku til að meika að skilja það sem þýskir háskólaprófessorar í heimspeki eru að segja um leyndardóma heimsins. Ég hef löngum verið talin bjartsýn stúlka. Bjart-sýn

Það er aðallega tvennt sem ég þarf að tjá mig um og hefur verið að brjótast um í kollinum á mér í marga marga klukkutíma. Annað er um jógúrt og hitt um kúk.
Jógúrtvalið er svo fáránlega mikið hér í Berlín, að ég veit ekkert hvað ég á að kaupa. Og áðan keypti ég nokkur, til dæmis eitt með poppkornsbragði!!!! Það var enn betra en ég hafði vonað, og nú spyr ég: Hvar er fólkið með ímyndunaraflið á Íslandi? Framandi bragðtegundir eru stundum það eina uppbrot í hversdagslífi sem maður getur leift sér (ég er ekki að meina að ég sé strax orðin leið á Berlín, að tala um hversdaginn, ég meina bara svona almennt í lífinu). MS: Grípiði tækifærið, experimentið eitthvað. Og þá er ég ekki að meina að setja á markaðinn Aloh-Vera jógúrt sem bragðast eins og gubb.
Klósettin í Þýskalandi eru eins og þau amerísku og ég er í smá aðlögun með þau. Maður verður óneitanlega miklu betur var við sinn eigin úrgang, þegar hann liggur splunkunýr og glansandi á sérstakri skoðuhillu þegar maður stendur upp, heldur en ef hann er marandi á hálfu kafi í vatni. 2 ókostir hillusystemsins: Þú veist allt of mikið um hvað þú borðaðir, og það er meiri lykt. Ég er að venjast þessu en það er skrýtið maður.

Hér er gaman, allt í lagi, byrja í skólanum í fyrramálið.
Adressa: Belforter strasse 18
10405 Berlin
tel: 0049-3044044003
bæ

Er í Berlín, eitthvað skrítið konneksjón í húsinu, en ég gerði heillangan og flotta texta um allt, svo bara fór hann út í loftið, með þráðlausa netinu. Það er stundum verra en oftast gott. Prófa bara að hafa þetta stutt, þegar það er stabílt geri ég annan langan ítarlegan texta. En það er gaman, allt er flott, fólk er kátt, Óliver fínn, íbúðin æði!

What metal band are you? Iced Earth You are Iced Earth! Your music stems from classic heavy metal with slight thrash roots. You love melody in your music, and you definitely love adding the element of fantasy with reality when you write your songs. Rhythm speed, heaviness, and melody are what you're all about! Elska að skoða síðuna hjá flosafellibyl, hann er alltaf með eitthvað skemmtilegt hvaða "eitthvað" ertu. Og ég er sumsé þetta blackmetalband, sem ég hef ekki heyrt í en Elvar segir að sé æði. Þar sem ég fíla blackmetal mjög vel er ég sátt, sko. Er hætt að vera stressuð, hef gefist upp á því. Það gerist sem gerist.

það er skemmtilegt:
Að skulda minna en í gær
Að vita að bráðum á ég aftur heimili
Að vera á leiðinni í meiri hita
Að vera að fara að læra nýtt tungumál
Að eiga vini sem segjast sakna mín
Að hætta að vera stressuð
Það er skemmtilegra:
Að vera orðin rugluð af stressi, því ég veit að ég kem ekki til með að geta gert allt sem ég þarf að gera. En hver segir að ég þurfi nokkuð. Ég gæti hent öllum fötunum mínum, og þá þarf ég ekki að pakka þeim. Ég hendi samt ekki gítururururururrunum. (sko þetta var fyndið inni í hausnum á mér...þar sjáið þig ástandið á mér).
ÆTLA að klára allt sem ég get
ÆTLA að gera mitt besta
og svo ætla ég að sleppa restinni, og stinga af til útlanda..hahah

Nú eru 3 sólarhringar í för. Ég er enn að rita gerð, gera ritgerð. Það er snúið að klára marga hluti fyrir eina tímasetningu. Oftast gerir maður bara eins og maður getur og klárar rest eftir helgi, eða svona einhvernvegin þannig. En það sem ég klára ekki fyrir föstudag um hádegisbil, verður ekki gert fyrr en næsta sumar. Ég er að nálgast það að hafa borgað öllum sem ég skulda, líka skattinum. Þá er ein ritgerð, ganga frá L.Í.N. (ég meina ekki myrða, heldur ljúka við umsókn, o.s.frv.), og nokkrir svona litlir sætir blesskossar á kinnar eftir. Þeir sem vilja blesskoss á kinn geta hringt í mig, og ég kem og kyssi og drekk kveðjukaffi. Þarf að vera í Reykjavík daglega fram á föstudag hvort eð er.
Ljósanótt reyndist vera sú besta skemmtun sem ég hef upplifað í Reykjanesbæ. Það var hreinlega æði. Hljómsveitin mín er bara geðveik, og mjög leiðinlegt að vera að leggja henni í bili. Svo hitti ég endalaust mikið af skemmtilegu fólki, og drakk náttúrulega ótæpilega með þeim, en það var bara alveg ókey. Ég þakka fyrir mig, vona að Ljósanótt sé byrjunin á aukinni heimsmenningu í Keflavík. Hingað til hefur verið hending að sjá fólki bregða fyrir á götum úti, nema á bílunum sínum. En þarna var allur bærinn og hálf Reykjavík líka, bara allir á röltinu og að leika sér niðri í bæ. Mjööööööög gaman.
Bæ...

Kominn september,
ég er að tapa mér.
Ákvað því að semja ljóð
því að í því er ég góð.
Lýsa mínu stressi og streitu
sem að orsakast af þreytu.
Allt sem þarf að klára hér
áður en af landi fer.
Til þess hef ég sjö daga,
á nóttunni ligg ég andvaka,
skatta borga, ritgerð smíða
horfi á tímann líða og líða,
redda öllu, og verða klár
til að fá ekki magasár.
Spila á morgun á Ljósanótt,
þar til er mér ekki rótt.

Þarf að hætta að hugsa um allt
í einu, bara drekka malt
tjilla svo og ákveða
að taka bara klukkutíma.
Gera hann að góðri stund
skreppa líka kannski'í sund
Kaupa gott í bakarí
fara loks að treysta því
að allt fari að lokum vel
ÞVÍ ÉG Á ÞAÐ SKILIÐ!!!!!!!!!!
(and the crowd went wild -aaaaaaaaaaaaaaaaaaaaaaaaaaaaaa)
takk fyrir, takk fyrir

Hæ hæ hæ
hátíð er í bæ.
Nú er síðasti Næturvörðurinn á dagskrá í kvöld. Held ég að ég eigi nú aldeilis eftir að sakna þessarar vinnu, það voru mjög blendnar tilfinningar sem skutust gegnum koll minn í gær þegar ég var að finna tónlist í þáttinn. Ég reyni alltaf að muna allar lyktir sem mér þykir vænt um, og lyktin af vínilplötunum í kjallaranum hjá RÚV, sem ég hef óspart sótt í, er nú komin í lyktarbankann minn. Vonandi á ég einhverntímann seinna eftir að vinna meira þarna, þetta er góður vinnustaður og frábær andi. Í kvöld verður þema þáttarins Kveðjur, (hvað annað...?) og býst ég við því að lokaþátturinn verði með dramatískara lagi, en auðvitað samt svaka skemmtilegur. Það er svo skemmtilegt að vinna svona á nóttunni, vera aleinn inni í herbergi, með góða tónlist á fullu, og vitandi af fullt af fólki sem er að gera allskonar hluti, og þau eru að hlusta á tónlistina með mér. Ég verð bara að reyna að redda mér útvarpsþætti í Berlín eða eitthvað. Kannski hef ég bara sjóræningjastöð í stofunni, og sendi út, fyrir götuna mína...yfirtek allar tíðnir í eins kílómetra radíus....gæti verið gaman.

Ég sko skil stundum ekkert í þessu bloggtæknidóti, ha. Ég er búin að reyna að fá þarna soldið flott sem ég skrifaði fyrir mörgum dögum til að birtast, og það bara vill ekki gerast, og svo vildi ég bæta við nokkrum linkum á bloggara sem ég les og vil hafa og það gerist ekkert.!!!!!!!!!Búhúhú, mér finnst þetta ekki gaman, sko. Það eru allir svo klárir í að gera svona, en ég ekki. Ósanngjarnt. Vona að þetta birtist, og svo má einhver koma og kenna mér á þetta drasl. Hver vill koma og hitta mig bráðum...og vera bloggnördar saman? Ég er sko upp í þjóðarbókhlöðu, að reyna að koma mér í lærugír. Kannast ekki einhver við það? Oft erfitt að byrja, en ekkert mál að halda áfram. Ef maður gæti bara sleppt því að byrja og haldið alltaf áfram, þá væri maður að ljúka doktorsprófi, en ekki nýbúinn með BA, og það eftir humm**10**humm ára veru í háskóla. Þetta er nú alveg frábært ha. Og gaman að vera til... ætli þetta komi nokkuð til með að vilja birtast heldur.... kemur í ljós.
Talandi um ljós: Heiðingjar spila á ljósanótt í Reykjanesbæ, ekki núna heldur næstu helgi. Þar verða Hjálmar og Æla og ég veit ekki hvað og hvað. Gleði og Sæla, Hjálmar og Æla!!!!!!!!!!

Nú er ég hætt að vinna, og fúll tæm heimspekinemi, þar til við hverfum í útlönd. Þetta er gott, og fínt að venja sig við að fara að læra aftur, eins og manneskja. Það er nefnilega mjög erfitt að finna tíma fyrir nám, þegar maður er í einhverjum vinnum líka. Vinnur veita peninga, en nám ekki svo valið er auðvelt. En það er semsé niðurstaða nefnarvinnu sem fór fram í höfuðkúpu minni, að til að geta skilið sátt við allt, verði ég að ljúka einni 12-15 síðna ritgerð um vilja Descartes, fyrir hina finnsku kennslukonu Minnu, sem kom frá Finnlandi í vor til að kenna okkur. Það er gott að vera námsmaður, þegar maður hefur gaman af því sem maður er að læra, og þegar maður er ekki að stressast út af peningaleysi. Ég hef líka fengið aðra niðurstöðu úr nefnd, (greinilegt að þeir hafa verið duglegir að funda í hausnum á mér), en það er að ég ætla að böska á föstudagseftirmiðdögum í Berlín. Það er spennadi verkefni sem verður gaman að sjá hvað kemur út úr. E.t.v. vilja Berlínarbúar ekki sjá mitt framlag til kassagítars-og sönggötukúltúrs, en svo er aldrei að vita nema þetta gangi bara vel. Kannski verð ég ofsótt af öðrum böskurum sem þola enga samkeppni.....spennó!!!

Hallúúú
Markaður verður víst ekki þessa helgi, en þá næstu á eftir er það öruggt. Það er sama helgin og menningarnótt, og giftingin sem ég er að fara að syngja í og alls kyns gleði. Ég er þó ekki aðgerðarlaus um helgina, ætla meðal annars að reyna að nýta bókasafnsaðstöðu í Kef. og vinna að ritgerð um Descartes. Svo er kominn tími á að leigja sér vídeómynd og borða nammi. Vinn enn í póstinum og geri út mánuðinn. En ég verð að játa að í mig er kominn leiði. Þetta gerist næstum því alltaf með mig og vinnur. Eftir svona sirka 3-4 mánuði hef ég einfaldlega fengið nóg og finnst ég vera að eyða tímanum mínum í vitleysu að sækja vinnu. Þetta er náttúrulega afskaplega heimskuleg afstaða, ég geri mér grein fyrir því. En svona er það bara,...nema þegar kemur að tónlist, þá fæ ég aldrei leið. Og vinna mín sem Næturvörður á Rás 2 hefur bara orðið skemmtilegri, en hún er samt bara einu sinni í viku í undirbúning, og svo 4 tímar í beinni. Það er ekki sama og mæta dag eftir dag. Gæti ég verið með rútínufóbíu? Á þessum síðustu og bestu tímum þegar til eru fóbíur fyrir öllu, og um allt.....Ég er alla vega ekki með rúsínufóbíu...mmmmmm rúsínur, helst með súkkulaði. Sko, ég er nefnilega hætt að éta nammi. Og þetta er í annað skipti sem mér dettur nammi í hug í þessu eina bloggi. Hvað er í gangi? Ég er fráhuga rútínum, en háð nammi....Vill einhver vinsamlegast sálgreina mig!!!!!!!!!!!!!!!Núna!!!!!!!!!!!!!

Ja mikið svaðalega er orðið langt síðan maður skrifaði. Lífið hefur samt tekið stakkaskiptum á þeim 3 vikum sem liðið hafa á milli blogga. Ég er flutt til Keflavíkur, búin að hreinsa og skila íbúðinni í bænum, og keyri nú á milli vinnu og heimilis út Ágústmánuð. Ég hef svo pantað miða til Berlínar fyrir alla fjölskylduna, og við leggjum í hann þann 10. september. Það er fín dagsetning, á föstudegi, og með smá viðkomu á Kastrup-flugvelli Danaveldis. Jón Geir trommari og kona hans Nanna létu svo vel af aðstöðu fyrir börn á Kastrup að ég hætti að vera hrædd við að vera með Óliver í nokkra klukkutíma að bíða eftir næstu vél. Nú hlakka ég bara til, og ekkert múður. Komutími til Berlínar er svo tæplega ellefu að kveldi, og verð ég að gera einhverjar ráðstafanir til að komast inn í borgina þá. Við þekkjum nokkra Berlínarbúa, og ef einhver þeirra skyldi slysast til að lesa þetta, þá mætti sá hinn sami hafa samband hér: heidingi@hotmail.com. Hef svo verið að garfa í alls kyns málum, sækja um hitt og þetta, námslán og ritgerðafresti og blí blí og bla. Þetta verður að lokum nákvæmlega eins og það á að vera, og ég er að springa ég hlakka svo til. Ætla í bíó á eftir með Írenu, Aþenu og Óliver, svaka stuð að prófa bíó í Keflavík. Það eru einhver ár síðan ég fór síðast á bíó hér. Held bara að ég hafi séð Diddu og dauða köttinn síðast hér. Keflavík er annars bara fín, og aðeins minni vindur en mig minnti. Samt er besta veðrið alltaf í vesturbænum í Reykjavík. Ég skil ekkert í því, það er alltaf logn í vesturbænum....
Markaðurinn í Klink og Bank verður á sínum stað næstu helgi, og ég ætla að reyna að vera báða dagana, þann 14. og 15. ágúst. Komin með fráhvarfseinkenni í að spila óskalög, það er svo frábært að böska svona á kassagítar. Er að spá í að gera það á götum úti í Berlín, fyrir helgarmatnum, af því að LÍN er rekið af púkum Satans, og ætlar að lána mér 40 þús. á mán. til að lifa af í útlöndum.....
Sem betur fer kann ég að syngja og spila, svo ég held að þetta reddist.
En ef ykkur vantar föt, hillur smáhluti, skó, og allskonar, þá komiði í Klink og Bank næstu helgi. Að lokum: Gleðilegt Gaypride

Markaður aftur í dag. Þessi markaður er líklega bara kominn til að vera í sumar. Fólkinu sem er að selja allskonar þarna finnst svo gaman að enginn vill hætta. Ég seldi sum sé smá föt og nokkra geisladiska og slatta af óskalögum í dag, og fékk nokkra þúsundkalla upp úr krafsinu, og svo keypti ég mér yndislegt sushi þarna, og líka mohito-kokkteil. Þetta var náttúrulega bara æðislega gaman. Sérstaklega vegna þess að Óliver stuðbolti var með, og manni finnst bara allt skemmtilegra þegar hann er með. Hann hjálpaði mér að syngja nokkur lög og einu sinni sagði hann um leið og lagið hafði klárast: ,,Búið, næsta lag!!!" Hann skilur greinilega um hvað sjóvbissnessinn snýst, er ekkert að flækja þetta. En....næsta helgi, í klink og bank, gengið inn úr portinu, mjölnisholtsmegin, frá eitt til sex, báða daganna. Frábært!!

Heiða og Elvar selja allt!!!!!!!!!!!!!!Eða næstum því, við seljum geisladiska, bækur, föt, og ýmsa smáhluti. Svo seljum við óskalög á 50 kall. Tökum með okkur 2 kassagítara, og spilum hvað sem er sem fólk biður um. Bara borga, við spilum!!! Svona á það að vera. Markaðurinn sem þetta fer fram á er í Klink og Bank í Brautarholti, Reykjavík, milli kl. 13 og 17 laugardaginn 3. júlí. Allskonar fólk að selja allskonar varning og list. Sumir verða með gjörning, sumir ætla að elda mat og selja, sumir ætla að vera með áróður. Markaðurinn breytist svo í tónleika, sem hefjast um kvöldmatarleitið. MÆTIÐ!
(af mér er annars allt gott að frétta)

það er gaman, lífið er gott, veðrið líka, allt í lagi, langar til að gera meiri tónlist, hlakka til að fara til berlínar. hef ekkert að segja nema lalalalalala, og tralalalalala síjúleiter

oooooooooooooooooo allt bloggið mitt týndist, ég var klaufastelpa!! En higlitesin voru: Pixies góðir, ég hamingjusöm að hafa valið þessa tónleika, mættu samt hreifa sig meira, ritgerðir mjakast, ég ætla að gera meiri tónlist og læra þýsku í sumar, næsti næturvörður um upprunal. og íslensku útg. af lögum, þema frá vinnufélaga í póstinum, verður gaman,allir ístuði?? já´jájá, hei, ég nenni ekki aðskrifa annað langt og fínt blogg, þetta er svona skeytaútgáfan
>BÆ

Nú er bara búið að vera gaman, en ég hef samt verið með bleikaugnasjúkdóm í 5 daga. Annaðhvort er þetta vírus eða ég er Zombie, þeir eru víst svona pinkeye-eitthvað. Hef samt ekki ennþá fundið fyrir löngun í að éta fólk í kring um mig, en maður veit sko aldrei. Hins vegar hefur verið slatti að gera, eins og svo oft áður. Er u.þ.b. að klára eina ritgerð, og þá eru tvær eftir. Svo hef ég verið að gera smá tónlist, og það er náttúrulega oft þannig. En ég var samt búin að setja mér það markmið að gera enga tónlist fyrr en ritgerðir væru búnar...það virkaði bara eins og vítamínsprauta á músuna mína. Hef nú samið eitt ansi gott kántrýlag, og sungið 2 lög inn á plötu, og spilað hljómborð í lagi sem Hellvar og Begga sömdu saman, ...allt eftir að ég fór í straffið. Týpískt. Gaman samt. Í dag er ég á Laugarvatni, fór í gufuna í von um að vírusinn færi við það. Hann fór ekki, og ég held ég sé aftur komin með hita, var sko með hita á miðvikudag þegar þetta byrjaði. Það er læknir á Laugarvatni á morgun, ég er mikið að spá í að láta hann segja mér að ég sé ekki Uppvakningur, og gefa mér eitthvað krem og svoleiðis. Hér er svo Barbapabbapersónuleikinn minn!!! Ég er náttúrulega nörd, og það er best.BÆ
You are Barbatine! You are well-read and love to
learn. You were gloomy in your youth and found
nothing you liked to taste, but you're older now,
and have an incisive sense of humour that
makes you and others smile.


Which Barbapapa Personality Are You?
brought to you by Quizilla

HÆ Krakkar!
Enn er allt með kyrrum kjörum, ég er ekki búin með ritgerðir, en vinn statt og stöðugt í þeim. Hef ekki hætt í póstinum heldur, þótt ég hafi panikkað við það að fá fyrsta launaseðilinn minn. Er nú hætt að líta á þetta sem launaða vinnu, heldur er þetta heilsubótaganga á morgnanna, og svo hjálpa ég nokkrum samborgurum mínum að fá póstinn sinn heim! Það kemur mér svo skemmtilega á óvart þegar, einu sinni í mánuði, einhver Íslandspóstur leggur inn nokkra þúsundkalla á reikninginn minn. Og svona held ég gleði minni, enda eingin ástæða til annars. Svo tók ég þetta skemmtilega persónuleikapróf, fann það hjá honum flosa fellibyl, en ég er einmitt mikill Prúðuleikaraaðdáandi. Niðurstaðan er skemmtileg, og kemur ekkert smá á óvart....eða hvað? Have fun

You are Janice.
You dig the groove man, nothing can bum you out.
Too bad you're too stoned to notice.

INSTRUMENT:
Like, you know, guitar, fer sure.
LAST BOOK READ:
"Finding Your Past Lives on the Web"

FAVORITE EXPRESSION:
"Fer sure, like, fer sure."

FAVORITE THINGS:
Peace, love and, like, granola, totally.

NEVER LEAVES HOME WITHOUT:
Her inner child.


What Muppet are you?
brought to you by Quizilla

Það var mikið... ég segi nú bara ekki annað!!! Ég var bara orðin hrædd, og skildi ekki neitt í neinu, það bara leið og leið tíminn og ekkert kom bloggið. En ég er hér staddur á alls engum bömmer, heldur bara í sólskinsskapi, enda er komið sumar og sól. Gleðilegt sumar, og það er alveg ókeypis að b.r.o.s.a....Ég er byrjuð að vinna í ritgerðum fyrir háskólann minn, og gengur hægt en örugglega, svo er ég líka byrjuð að vinna í póstinum fyrir hádegi. Þetta er mér ekki ókunn vinna, en ég hef verið bréfberi nokkrum sinnum áður, síðast 2000. Fékk afbragðs hverfi, og fína kennslu á það, og allt er bara glimrandi. Það er svo gott að vakna og gera eitthvað af viti, fá sér morgungöngutúr, og vera búin að þessu í síðasta lagi um eitt leytið, þá er allur dagurinn eftir, og þá verð ég nú að vinna í ritgerðum. Ég er dáldið sátt bara við þetta hlutskipti mitt: Nemi/Bréfberi/Tónlistarkona/Útvarpskona....og margt annað. Það er líka svo gaman að láta minna sig á að bréfalúgan getur verið vettvangur alls kyns gleðilegra sendinga, ef maður vill. Það þurfa semsagt ekki bara að koma reikningar inn um hana, ótrúlegt en satt! Maður er líka eitthvað svo fastur í að senda rafpóst til vina og kunningja, en það er til nóg af fólki ennþá sem sendir...og fær til baka, sendibréf. Fólk getur líka gerst áskrifandi að alls kyns blöðum og tímaritum, og það er meira að segja hægt að vera í bókaklúbbum sem sendir manni reglulega heim skemmtilestur. Bréfalúgan er eins skemmtileg og maður vill að hún sé. OOOOOOOOOOggggg það er alveg ókeypis að b.r.o.s.a!!!!!!!!!!!!
Allir í stuði, og bless

Jahahahahahahá?!
Nú er bloggtími. Ég er sko að gera allskonar, ótrúlegt en satt. Spila á tónleikum fyrir félagið Ísland-Palestína fimmtudagskvöldið 8. apríl á Jóni Forseta. Hljómsveitin mín kemst ekki, það eru allir svo duglegir í allskonar hljómsveitum öðrum og látum, þannig að ég hef ákveðið að spila bara ein, með kassagítar. Að öllum líkindum mun ég frumflytja einhver ný lög þarna, en annars sé ég bara til og geri eitthvað skemmtilegt. Svo kvöldið eftir, þann 9. (eftir miðnætti, reyndar þá kominn 10.) ætla ég að dj-a á 22!!! Byrja klukkan rúmlega 12 og hætti hálf-sex!!! Þetta verður sko gaman. Svo er Næturvörðurinn á dagskrá laugard, 10. og þá er þemað ALLT/ALL/EVERYTHING.

Þversögnin um aprílgabbið: Þetta er aprílgabb!

HEIÐINGJAR spila á styrktargiggi fyrir götubörn í kambódíu kl. 10 miðvikdagskveld 31. mars á grandrokk. tónleikarnir áttu að vera á fimmtudeginum en voru færðir. spilum því örstutt þarna en löbbum okkur svo yfir á ellefuna og þar spilum við fulla lengd af tónleikum (fremur stutt samt, því við kunnum ekkert obboðslega mörg lög, ég myndi segja svona 13, og það er með nýja laginu sem er ekki tilbúið og því spilum við það ekki). svo hita HEIÐINGJAR upp fyrir brjálæðingana í CHANGER á föstudag á nýja staðnum sem ég man ekki hvað heitir en er á lækjartorgi við hliðina á sentrúm skiptistöðinni. í CHANGER er maður sem getur öskrað og sungið á innsoginu líka, þarf sem sagt aldrei að hætta að syngja ef honum sýnist svo. það er bara fríkað, algjört fríksjó, þess virði að mæta. svo er trommarinn í CHANGER tvífari einhvers í færeyska bandinu TÝR, en CHANGER eru samt skemmtilegri en TÝR. bara langaði að segja ykkur frá þessu. og ef einhver veit um miða á Pixies þá má hann láta mig vita

Ók, ég er snillingur!
Ég sver það að ég hélt alltaf að maður gæti bara ekki fiktað sig eitthvað áfram og breytt öllu sjálfur, án þess að fá hjálp. Ég hélt að maður þyrfti gráðu, eða námskeið, eða allavega vin/vinkonu sem horfði yfir öxlina á manni og hjálpaði smá.....En ég gerði þetta ein, sver það. Og á minn mælikvarða er þetta flottasta bloggsíða í heimi, en ég veit ekki alveg hvað ég gerði ennþá. Kommentakerfið fékk ég upplýsingar um hvar ætti að ná í, en litirnir og eitthvað... veit ekki. En þetta er náttúrulega bara eins og með tónlistargræjur, á meðan maður kann ekkert á t.d. trommuheila og fiktar eitthvað, kemur undantekningarlaust eitthvað mjög flott út. Þegar maður hins vegar hefur lært almennilega á gripinn, er ekki sjálfgefið að sköpunin verði eins frjó. Þá fer maður að nota hann eins og á að gera, boring. Ég lýsi því hér með yfir að það á ekki að kunna, bara gera. Pönk í hnotskurn, og notalegur lífsstíll það!!!
(borgar sig samt kannski að kunna á bíl, áður en maður fer að keyra....en svona oftast virkar þessi speki vel...)

æji, hvað það er nú gaman að fíla tónlist svona vel. Ég er í dómnefnd í músiktilraunum og það er bara yndislegt. Það er svo hollt og gott að heyra í öllum þessum krökkum sem elska hljómsveitirnar sínar og eru að fíla sig í tætlur, sum hafa aldrei spilað í svona góðu sándi áður, einhverjir eru með smá reynslu í tónleikahaldi, aðrir enga....en allir eiga það sameiginlegt að finnast tónlist frábær, og elska að vera í hljómsveit. Hey, ég er bara hjartanlega sammála þeim, mér finnst tónlist frábær, og eeeeelska að vera í hljómsveitum. Það er ekkert eins gleðjandi og að sjá góða tónleika, eða spila á góðum tónleikum, eða uppgötva nýtt band, nýja tónlist!!!! Músiktilraunir eru bestar í heimi og ég fer sæl að sofa í kvöld!

Það er ágætt að blogga, en samt er ég strax komin með smá leið. Mér finnst dáldið eins og ég sé að halda dagbók til að halda dagbók. Ekkert ósvipað og þegar ég fékk flottar dagbækur með lás og öllu í jólagjöf og var dugleg í viku, en svo var nýjabrumið farið af. Það er samt aðeins öðruvísi þegar maður ímyndar sér að einhver lesi kannski dagbókina. Það er nú samt svo mikið af svona bloggsíðum að eflaust les þetta enginn. En notagildi heimasíðunnar er samt tvímælalaust meira en dagbókar sem er læst og eingöngu ætluð fyrir mann sjálfan. Hér gæti ég tildæmis komið á framfæri áformuðum tónleikum Heiðu og Heiðingjanna. Við spilum næst þann 20. mars á Grandrokki. Hitum upp fyrir hljómsveitina 5ta Herdeildin sem heldur sína útgáfutónleika. Heiða og Heiðingjarnir fara á svið kl. 21:00, því alterígóið mitt, næturvörðurinn, þarf að vera kominn upp í útvarp klukkan 22:00. Talandi um Heiðu og Heiðingjana....eruð þið ekki alveg örugglega búin að kaupa nýja diskinn, tíufingurupptilguðs? Hann er svona gleði-hvetjandi geisladiskur, sem hressir mann við í skammdeginu.

Það er alveg undarlegt hvað stórir hlutir skipta oft engu máli og litlir hlutir skipta öllu máli. Ég fann og dánlódaði leik sem ég hef ekki spilað síðan 1982, það var í leiktækjakassa í júnó-ís í skipholtinu. Leikurinn hét Burger-time, og á netinu er að finna eftirhermuútgáfu af leiknum, sem er kallaður Burger space. Ég er bara verulega hamingjusöm að geta leikið þennan leik hvenær sem ég vil. Það er skítaveður, ég er á kúpunni, búin að vera veik í 8 daga....en ég á Burger space. Á morgun er mánudagur og ég ætla að vera sjúklega brjálæðislega dugleg og gera 8500 hluti sem ég gat ekki gert í síðustu viku sökum lasleika, og lífið er gott....ég á Burger space.

haaaaa, er enn lasib, kvebuð frá helvíti og ég er ekkert albeg viss ub að það sé neitt nógu gleðilegt í augdablikinu til að segja hér frá.....Jú, nema ef þið eruð ekki með stíflað nef, njótiði þess, því það er víst æðislega gott að anda. Sjálf man ég ekki alveg hvernig það var